Ինչպես արդեն տեղեկացրել ենք, ՀՀ վարչական դատարանում, երբ քննվում էր ՀՀ ոստիկանության հայցը՝ ընդդեմ «Նախախորհրդարանի» հիմնադիր խորհրդարանի ընտրական հանձնաժողովի նախագահ Վարդան Գերավետյանի (նախագահող դատավոր՝ Արման Թովմասյան), դատավորի որոշմամբ խոչընդոտվեց լրագրողների գործունեությունը` նրանց թույլ չտալով տեսալուսանկարահանել: Խնդիրն այն էր, որ ոստիկանության ներկայացուցիչ Մարթա Մելիքսեթյանը առարկեց, որ կատարվի տեսալուսանկարահանում:
Արդեն, երբ նիստն ավարտվեց, լրագրողները փորձեցին տեսալուսանկարահանումներ կատարել լրագրողական նյութն ամբողջացնելու համար: Նիստի ավարտից հետո ոստիկանության ներկայացուցիչ կանայք, թղթով դեմքերը փակելով, դուրս եկան դատական նիստերի դահլիճից: Սակայն լրագրողների աշխատանքը կրկին խոչընդոտվեց, այս անգամ ոմն դատական կարգադրիչի կողմից, որի ինքնությունը այդպես էլ չբացահայտվեց:
Փորձեց միջամտել նշված դատական գործով ներկայացուցիչ, իրավապաշտպան Տիգրան Եգորյանը: Նրա` ներկայանալու հորդորին չպատասխանեց դատական կարգադրիչը, ինչպես նաև դատական կարգադրիչի անունը չասացին ոչ մյուս կարգադրիչները ոչ էլ ստորաբաժանման ղեկավարը, որպեսզի իրավապաշտպանը կարողանա բողոք ներկայացնել տվյալ դատական կարգադրիչի ոչ իրավաչափ գործողությունների վերաբերյալ` ծառայության ընթացքում:
Ավելին, իրավիճակը հասավ նրան, որ նույն այդ կարգադրիչը փաստաբանի երեսին դուռ շրկխացրեց` սպառնալով, թե դեռ մենք կհանդիպենք:
Կարդացեք նաև
Դատական կարգադրիչների ստորաբաժանման ղեկավարն էլ, ով կրկին չցանկացավ հայտնել տվյալ դատական կարգադրիչի անունը, խնդրեց իրեն էլ չտեսալուսանկարահանել` Տիգրան Եգորյանին հրավիրելով «առանձին զրույցի»: Երբ փաստաբանը ցանկացավ հրապարակային զրուցել` ստորաբաժանման ղեկավարը նշեց, թե «Ինչ է`հիմա դուք այստեղ ֆոտոսեսիա՞ եք անում»:
Տաթև ՀԱՐՈՒԹՅՈՒՆՅԱՆ
