Այսoր տաքսու վարորդների բողոքի ակցիայի ընթացքում, որի ընթացքում նրանք պահանջում էին, որպեսզի հավասար մրցակցային դաշտ ստեղծվի անօրինական տաքսու վարորդների եւ լիցենզավորում ունեցող վարորդների միջեւ եւ որպեսզի դեղին համարանիշները չփոխարինվեն սպիտակ համարանիշներով, հրավիրված էին նաեւ տրանսպորտի եւ կապի նախարարության ներկայացուցիչներ: Ակցիայի ներկայացուցիչները նամակ էին հղել տրանսպորտի եւ կապի նախարարությանը, ցանկանալով, որպեսզի մեկ շաբաթվա ընթացքում վերանայվի դեղին համարանիշների վերաբերյալ օրենքը:
Բողոքի ակցիայից մեկ ու կես ժամ հետո, ակցիայի վայր ժամանեց տրանսպորտի եւ կապի նախարարության տրանսպորտի վարչության պետի տեղակալ Դավիթ Մելքոնյանը, պատճառաբանելով, որ ուշ է եկել, քանի որ տեղյակ չէր, որ նախարարությունից հրավիրել էին ներկայացուցչի: Մինչդեռ մեկ օր առաջ ակցիայի մասնակիցները իրենց հաղորդագրության մեջ հստակ նշել էին, որ ակցիային հրավիրում են տրանսպորտի եւ կապի նախարար Գագիկ Բեգլարյանին:
Մանրամասն ՝ տեսանյութում
Դավիթ Մելքոնյանը վարորդների հետ զրույցում ասաց, որ օրենքը Ազգային ժողովում է, երկրորդ ընթերցմամբ անցել է, եւ վերջնական որոշումից հետո պատասխանն ավելի հստակ կլինի:
Վարորդներից Բաբայան Հմայակը ներկայացուցչին հարցրեց՝ ինչո՞ւ է անորոշ դեղին համարանիշների հարցը, ինչին Դավիթ Մելքոնյանը պատասխանեց, թե դեղին համարանիշները դուրս են գալու Ազգային ժողովում օրենքի ընդունումից հետո: «Օրենքի ընդունումից հետո այլեւս չի լինի դեղին համարանիշ, բոլորը հավասար կլինեն»:
Մանրամասն՝ տեսանյութում
Կարդացեք նաև
«Քաղաքական դիրքորոշում» հ/կ նախագահ Գեւորգ Դոստուրյանն էլ Դ. Մելքոնյանին ասաց, որ համաձայնել են, որպեսզի անօրինական վարորդներին չգրանցեն միայն այն պատճառով, որ գործազրկություն կա երկրում, սակայն վարորդների մասով գործազրկություն չկա: «Տարի ու կես է օրենքը չի աշխատում եւ անհավասար դաշտ է ստեղծվում: Ո՞րն է պատճառը, որ ուժի մեջ եղած օրենքը չի գործում: Վարորդները վարկի տակ են, չեն կարողանում վարկերը փակել, մեքենան սարքել»:
Հարցին՝ նախարարության ներկայացուցիչը պատասխանեց. «Չեմ հասկանում ինչո՞ւ չի կարողանում վարկը փակել, արգելե՞լ ենք իրեն աշխատել»:
Գեւորգ Դոստուրյանը մեկ շաբաթ ժամանակ տվեց նախարարությանը՝ ասելով. «Բարի եղեք, մեկ շաբաթվա ընթացքում որոշում ընդունեք եւ պատասխանեք»:
Նախարարության ներկայացուցիչը լրագրողներին հայտնեց, որ վարորդներին հավասար մրցակցային դաշտ բերելու համար բոլորը լինելու են սպիտակ համարանիշներով:
Մանրամասն՝ տեսանյութում
Էլյա ՀՈՎՀԱՆՆԻՍՅԱՆ
