Այսօր մամուլում տեղեկություններ էին հայտնվել այն մասին, որ չնայած հայ-ռուսական համաձայնագրի 49 տարով երկարացմանը, ՌԴ-ն իր սահմանապահներին հանում է Թուրքիայի սահմանից: Պատճառը, ըստ հրապարակումների, Ռուսաստանի`Թուրքիայի հետ ունեցած շահեր են: Մենք այս տեղեկատվությունը փորձեցինք ճշտել ռուսական կողմից, սակայն պաշտոնական պարզաբանում ստանալու մեր ջանքերն ապարդյուն անցան: Ռուս սահմանապահ զորքերի մի քանի ներկայացուցիչներ մեզ հետ ունեցած հեռախոսազրույցում զարմացան մամուլում հայտնված այս տեղեկատվությունից` հերքելով դրանք:
Մենք փորձեցինք այս լուրերը ճշտել ՌԴ դեսպանատանից, սակայն,երբ հետաքրքրվեցինք, թե ով է մամլո քարտուղարը ու խնդրեցինք կապ ստեղծել նրա հետ` չնայած ժամը 17.25-ն էր, խորհուրդ տվեցին զանգահարել երկուշաբթի` իրենց իսկ բառերով ասած աշխատանքային օր:
Փորձեցինք կապ հաստատել նաև Հայաստանում ՌԴ սահմանապահ զորքերի հրամանատար Յուրի Ալեքսանդրովիչ Ռադիոնովի հետ. նրա գրասենյակային հեռախոսահամարները տևական ժամանակ վերցնող չկար:Պարոն Ռադիոնովը չպատասխանեց նաև իր անձնական հեռախոսահամարին հնչեցրած մեր զանգերին:
Սահմանապահ ուղեկալի հրամանատար Անատոլի Շադրինն էլ մեզ հետ ունեցած հեռախոսազրույցում փոխանցեց, որ իրենք իրավունք չունեն պաշտոնական պարզաբանում ներկայացնել այս թեմայով` պաշտոնական պարզաբանման համար խորհուրդ տալով կապվել մամլո քարտուղար Գրեչինի հետ: Պարզվեց վերջինս էլ արձակուրդում էր: Զանգահարեցինք նաև ռուս սահմանապահ զորքերի օպերատիվ հերթապահ բաժին, այստեղ ազգությամբ հայ հերթապահից բացի ոչ մեկը չկար, և բնականաբար պաշտոնական պարզաբանում ներկայացնող այդպես էլ չգտնվեց:
Նունե ԱՐԵՎՇԱՏՅԱՆ
Ի՞նչու հայի սահմանը ռուսը պիտի ՊԱՀԻ: Այդ նույն ռու՞սը չէ,որ հայի թշնամուն օր ու գիշեր զինում է: Քո թշնամուն ուժեղացնողը քո «սահմանի պաշտպա՞ն»: Իսկ այդ պայմանագիրը չեղյալ պիտի հայտարարել: