Երեկ հուղարկավորեցին Գյումրու մանկավարժականի ռեկտոր Վարդևան Գրիգորյանի օրերս սպանված եղբորը` 50-ամյա Հարություն Գրիգորյանին, որն, ի դեպ, ըստ որոշ տեղեկությունների, վերջերս էր նշել իր ծննդյան տոնը:
Թե որն էր դեմ-դիմաց ապրող 35-36-ամյա հարևանի կողմից նրան սպանելու պատճառը, արդեն իսկ հայտնի է` խանդը:
Երեկ զոհին հուղարկավորելուց անմիջապես հետո Ախալքալաքից եկել ու մեղայականով ոստիկանություն է ներկայացել նրա հարևանը` Շիրակի մարզի ռազմական ոստիկանության քրեականի պետ Արման Կատունյանը:
Թե ի՞նչ զենքով է վերջինս կրակել Հարություն Գրիգորյանի վրա, իր ծառայողակա՞ն, ոստիկանությունից Aravot.am-ին փոխանցեցին, որ այս պահին ճշտվում է, թե որտեղի՞ց է ձեռք բերել զենքը, քանի որ դա իր ծառայողականը չէ:
Կարդացեք նաև
Ոստիկանության պաշտոնյան հաստատել է, որ խանդի հողի վրա է կատարել սպանությունը: Թե ինչ ցուցմունք է տվել, բնականաբար դեռ հրապարակման ենթակա չէ, այդուհանդերձ ոստիկանությունից մեզ փոխանցում են, որ երկու հարևանների միջև վիճաբանությունն ու հաշիվներն այս թեմայով առաջին անգամը չէին, տևական ժամանակ է` նրանք հարցեր են պարզել. ամուսինը, տվյալ դեպքում ռազմական ոստիկանության քրեականի պետը՝ խանդել է իր գեղեցկատես կնոջը, որոշակի կասկածներ ունեցել:
Գյումրիում երկու վարկած է շրջանառվում` կապված այս սպանության հետ. մեկն այն, որ երիտասարդ կինը ևս անտարբեր չի եղել հարևանի նկատմամբ, ամուսինը համոզվել ու սպանել է հարևանին, մյուսն էլ այն, որ Հարություն Գրիգորյանը սիրահետել է երիտասարդ հարևանուհուն, որն այս մասին տեղյակ է պահել իր ամուսնուն ու հանգել այս դաժան պատմությանը:
Ի դեպ, թաղակիցների ասելով, այս երկու հարևանները նախկինում ջերմ, մտերիմ հարաբերությունների մեջ են եղել:
Ինչևէ, ռեկտորի հանգուցյալ եղբոր դեմքն այս օրերին չեն բացել, քանի որ նա անճանաչելի է եղել:
Ոստիկանությունից մեզ փոխանցեցին, որ Հարություն Գրիգորյանին սպանելուց հետո նրան բերանքսիվայր գցել են փոսը, որը մոտ 50 մետր խորություն է ունեցել` բետոնի ջարդած կտորներով շրջափակված, ու նրա դեմքն ամբողջապես այլանդակվել է:
Նունե ԱՐԵՎՇԱՏՅԱՆ
