«Ցեղակրոն» կուսակցության նախագահ Շանթ Հարությունյանի եւ նրա ընկերների գործով դատական նիստի ընթացքում այսօր Կենտրոն եւ Նորք Մարաշ վարչական շրջանների ընդհանուր իրավասության դատարանում շարունակվում է գործով վկա ներգրավված ոստիկանների հարցաքննությունը:
Այսօր նախատեսված է տասը վկայի, երեք տուժող ոստիկանի հարցաքննություն:
Գործով վկա ոստիկան Գոռ Մովսիսյանի պատմելով, նոյեմբերի 5-ին 17: 00-ի սահմաններում Մաշտոցի պողոտայում երթի ընթացքում ռադիոկապով օգնության են իրենց կանչել, իրենք մոտեցել են ու տեսել, թե ինչպես են ցուցարարներին նստեցնում մեքենա: Երթի բուն ընթացքին ինքը ականատես չի եղել:
Հաջորդ վկա Մանուկ Նիկողոսյանը նույնպես պատմեց, որ անձամբ չի տեսել պայթյունները, տեսել է միայն դրանց հետքերը, պոլիէթիլենային տոպրակներ:
Կարդացեք նաև
Մյուս վկան՝ Արթուր Խուդինյանը երթի հենց սկզբից է եղել մասնակիցների հետ: Նա պատմեց, որ Շանթ Հարությունյանին ու նրա ընկերներին անձամբ է մոտեցել, հորդորել, որ չիջնեն դեպի Մաշտոցի պողոտա , բայց երթի մասնակիցները չեն լսել եւ դուրս են եկել պողոտա, որտեղ էլ տեղի են ունեցել պայթյունները:
«Տարբեր տեսակի փաթեթներ էին նետում, սկսվեց խառնաշփոթ, գոռգոռոցներ, բողոքի մասնակիցները մահակներով հարվածեցին ոստիկանության աշխատողներին, փորձում էինք կարգ խախտողներին հանել երթեւեկելի հատվածից, բայց շարունակում էին կարգը խախտել, այնուհետեւ սկսեցինք բերման ենթարկել»,- պատմեց Արթուր Խուդինյանը:
«Քացով աչքիդ տվի՞նք»,- ընդհատեց Շանթ Հարությունյանը:
Հետո շարունակեց հարցերը՝ «ինչ նկարագրեցիք, այնտեղ եղել ե՞ք հենց սկզբից, չե՞ք լսել, ինչ-որ բան եմ ասել, թե՞՝ ոչ: Ասել եմ, որ գնում ենք Բաղրամյան 26»:
Ոստիկանն էլ ասաց՝ սկզբում չի լսել:
Շանթ Հարությունյանը նաեւ հարցրեց, թե կոնֆլիկտը ինչպե՞ս է սկսվել:
Ոստիկանի պատմելով. «Հենց մոտեցաք մայթին, մոտեցել եմ, ասել, որ չի թույլատրվում փողոցն անցնել, բայց չլսեցիք, միանգամից դուրս եկաք փողոց»:
Շանթ Հարությունյանի հարցին, թե հետո դուք ինչ արեցիք, հարցաքննվող ոստիկանը պատասխանեց, որ ամեն կերպ փորձել են ցուցարարներին փողոցիցի մայթ հանել.«Նորից փորձում էի ձեզ համոզել, դուրս եկեք երթեւեկելի հատվածից: Դուք սկսեցիք գոռգոռալ, ու ձեր կողքի քաղաքացիները սկսեցին քաշքշել ոստիկաններին, այդ պահին որոշները գրպանից հանեցին փաթեթները ու սկսեցին պայթեցնել, սկսվեց խառնաշփոթը»:
Նա ասաց, որ դեմքով չի հիշում այն ցուցարարներին, որոնց մոտեցել ու հորդորել է՝ դուրս գալ մայթ: Ամբաստանյալներից Սեւակը հակադարձեց՝ «սուտ ես խոսում»:
Փաստաբան Արա Զաքարյանն էլ միջնորդեց դիտել դեպքերն արձանագրած տեսանյութը, որ վկան նշի, թե որ հատվածում է մոտեցել ու հորդորել, որ դուրս չգան մայթերից:
Դիտումից հետո էլ պարոն Զաքարյանը հայտարարեց. «Տեսանյութում հստակ երեւաց՝ երթի մասնակիցները անցնում են վկայի կողքով, իսկ նա որեւէ մեկին, որեւէ բառ չասաց, որեւէ շարժում էլ չարեց, իր համար կանգնած էր»:
Վկան էլ հայտնեց, որ մեկ այլ տեսանյութում երեւում է, թե ինչպես է ինքը մոտեցել է ու հորդորել:
Դատավորն էլ ասաց, որ այդ հանգամանքի վերաբերյալ դատողություններ անելու համար պետք է ավարտվեն ապացույցների քննությունը:
Ամբաստանյալներից մեկն էլ հարցրեց ոստիկանի մասնագիտական պատրաստվածության մեջ սուտ խոսելու պատրաստվածությունը մտնո՞ւմ է, թե՞՝ ոչ: Այս պահին դատական նիստը ընդմիջվել է:
Արփինե ՍԻՄՈՆՅԱՆ
Թե՛ Շանթի, իր ընկերների հետ, և թե՛ Վոլոդիա Ավետիսյանի խեղկատակ դատավարությունները նման են հնադարյան ստրկատիրական կարգերի ծիսակատարություններին, որի գլխավոր դեմքն է՝ խանը, քյոխվան, թե մոլլան,՝ վերջին բոլշևիկը, թաղի խուժանի մակարդակով։