Երեկ երեկոյան ժամը 20:30-ի սահմաններում Կապան քաղաքն իր բոլոր թաղամասերով եւ հարակից գյուղերով հոսանքազրկվել էր: Երկու ժամ շարունակ անսպասելիորեն մթության մեջ հայտնված բնակիչները տեղյակ չէին հոսանքազրկման պատճառների մասին, ինչն էլ շատերին անհանգստանալու առիթ էր տվել: Բնակիչները նույնիսկ փորձում էին այն կապել վերջին շրջանում սահմաններում տիրող լարված իրադրության հետ: Քաղաքում էլեկտրականությունը վերականգնեցին միայն 2 ժամ անց` 22:30-ի սահմաններում:
Ինչպես քիչ առաջ տեղեկացանք «Հայէլցանցեր» ՓԲԸ-ից` Սյունիքի մարզկենտրոնն ու շրջակա գյուղերը հոսանքազրկվել էին Կապանի ենթակայանի օդային գծի վրա տեղի ունեցած վթարի հետեւանքով:
«Այդպիսի վթարներ մենք ունենում ենք ամեն օր հանրապետության տարբեր շրջաններում: Սովորաբար պլանային անջատման մասին տարբեր լրատվական միջոցներով տեղեկացնում ենք, բայց վթարային անջատման մասին մենք հանրությանը տեղեկացնում ենք միայն խոշոր վթարների պարագայում, երբ զգում ենք, որ վերականգնման համար օրենքով նախատեսված 4 ժամը գերազանցելու ենք:
Մենք օրենքով պարտավոր ենք 4 ժամում վերականգնենք վթարը, եթե այն քաղաքային բնակավայրում է տեղի ունեցել եւ 8 ժամում` գյուղական համայնքներում»,- փոխանցեց «Հայէլցանցեր» ՓԲԸ-ի հասարակայնության և ԶԼՄ հետ կապերի դեպարտամենտի պետ. Նատալյա Սարջանյանը:
Ինչպես պարզեցինք` երեկ նույն ժամին մարզի մյուս տարածաշրջաններում նման խնդիր չէր եղել, հոսանքազրկվել էր միայն Կապանի տարածաշրջանը:
Մերի ՍՈՂՈՄՈՆՅԱՆ
