«Այդ հարցաշարը ՀՀ մշակույթի նախարարությունը չի ստացել: Հարցաշարը ոչ պատմություն է, ոչ էլ խնդիր է ներկայացնում, որ չպատասխանեինք: Այդ հարցերին մեր ամենօրյա աշխատանքում առնչվում ենք»,-Aravot.am-ի հարցին ինչո՞ւ են խուսափել պատասխանել Ինֆորմացիայի ազատության կենտրոնի (ԻԱԿ) կողմից կառավարման և ՏԻՄ մարմիններին ուղարկված հարցմանը`որը միտված է պարզելու այդ մարմինների հրապարակայնության և թափանցիկության մակարդակը, այսպես պատասխանեց ՀՀ մշակույթի նախարարության հասարակայնության հետ կապերի բաժնի ղեկավար Ալլա Սերոբյանը:
Ինչպես արդեն տեղեկացրել ենք, ԻԱԿ-ը հարցաշար էր ուղարկել կառավարման մարմիններին` նրանց աշխատանքի հրապարակայնության եւ թափանցիկության մակարդակը որոշելու համար: Սակայն Մշակույթի նախարարությունից որևէ արձագանք չեն ստացել: Ալլա Սերոբյանը մեզ հետ զրուցյում նշեց, որ արագ արձագանքել են հարցին ու կապ հաստատել ԻԱԿ իրավաբան Գևորգ Հայրապետյանի հետ: Այս մասին Ալլա Սերոբյանը մանրամասնեց. «Ոչ պաշտոնական և ոչ էլ ոչ պաշտոնական մեյլով նման հարցաշար մշակույթի նախարարությունը չի ստացել: Պարոն Հայրապետյանն էլ չբացառեց, որ դա կարող է տեխնիկական խնդիր եղած լինել»:
Մեր հակադարձմանը, թե ԻԱԿ-ն իր հարցաշարն ուղարկել է այն էլեկտրոնային հասցեով, որը նշված է ՀՀ կառավարության կայքում, Ալլա Սերոբյանը արձագանքեց, թե դա ուրիշ բաժնի հասցե է, ոչ իրենցը: Մենք էլ հարցրինք` արդյոք նախարարության բաժինները միմյանց հետ չե՞ն համագործակցում, Ալլա Սերոբյանը պատասխանեց. «Իհարկե, աշխատում ենք, բայց այդ բաժնից էլ պնդում են, որ նման հարցաշար չեն ստացել»:
Ալլա Սերոբյանը հավելեց. «Մենք Ինֆորմացիայի ազատության կենտրոնի հետ մշտապես համագործակցում ենք, քննարկում կայքի հետ կապված տեխնիկական և բովանդակային հարցեր: 2014-ի ընթացքում ընդամենը երկու պաշտոնական հարցում ենք ստացել Ինֆորմացիայի ազատության կենտրոնից, որոնց սահմանված ժամկետներում պատասխանել ենք»:
Կարդացեք նաև
Aravot.am-ի տեղեկություններով` նախարարությունում ոչ թե խուսափում են նման հարցումներին պատասխանելուց, այլ պարզապես նախարարությունում բաժինների աշխատանքները կանոնակարգված չեն, բարձիթողի վիճակ է այն աստիճան, որ չգիտեն, որ հարցմանը որ բաժինը պիտի պատասխանի: Էլ չենք խոսում այն մասին, որ նախարարությունում, ամենակենցաղային հարցերից սկսած ամեն ինչ համաձայնեցվում է մշտամնա նախարար Հասմիկ Պողոսյանի հետ: Այս առիթով Ալլա Սերոբյանը պարզաբանեց. «Նման բան չկա: Մենք ունենք աշխատակազմի ղեկավար, փոխնախարարներ, համապատասխան պաշտոնյաներ, որոնց հետ համաձայնեցնում ենք տեղեկատվությունը, ովքեր այդ պահին պատասխանատու են տվյալ ոլորտի համար»:
ԻԱԿ-ի հետ նախարարությունը պայմանավորվածություն է ձեռք բերել, որ կրկին ուղարկեն հարցաշարը և այս անգամ նախարարությունում հետամուտ կլինեն ստանալ և սեղմ ժամկետներում պատասխան տալ այդ հարցերին:
Տաթև ՀԱՐՈՒԹՅՈՒՆՅԱՆ
Լուսանկարը՝ Ալլա Սերոբյանի ՖԲ էջից:
