«Դա կարծես թե նախազգուշացում էր վճռական ճակատամարտից առաջ, թե ինչով կարող է այն ավարտվել ընդդիմության համար»,-անդրադառնալով ՀՀ ոստիկանապետ Վլադիմիր Գասպարյանի` թեժ աշնան կողմնակիցներին «սառը ցնցուղ» խոստանալու հայտարարությանը, այսպիսի կարծիք հայտնեց Միջազգային և անվտանգության հարցերի հայկական ինստիտուտի ղեկավար Ստեփան Սաֆարյանը:
Ըստ նրա` ոստիկանապետը, թեկուզ կատակի տեսքով, բայց քաղաքական գործընթացներին միջամտելու դրսևորում է ցուցաբերել` բացահայտ հայտ ներկայացրել աշնանային քաղաքական գործընթացներին մասնակցելու:
Ստեփան Սաֆարյանն այն տպավորությունն է ստացել, որ ՀՀ ոստիկանապետը սեփական նախաձեռնությամբ նման հայտարարություն չի արել, այլ «նրա միջոցով դա ասվել է ամենաբարձր մակարդակով»:
Դատապարտելով ոստիկանապետի նման պահվածքը` պարոն Սաֆարյանն ասաց. «Եթե ուզում էր խոսել այդ խնդրից, կարող էր ասել, որ մենք մեր պարտականությունները կատարելու ենք ինչպես միջազգային օրենսդրությունն է պահանջում և վերջակետ: Բայց դրանից հեռու անցնել ու ասել, թե մենք կարող ենք ավելի թեժ աշուն խոստանալ, սա նշանակում է հայտ ներկայացնել աշնանային քաղաքական գործընթացներին մասնակցելու, ինչն անթույլատրելի է»:
Կարդացեք նաև
Ստեփան Սաֆարյանը ոստիկանության վերջին տարիների վարքագիծը որակեց որպես «ճոճանակի նման տատանվող, երբ որոշ ակցիաներում կարող են լինել բիրտ ու ավտորիտար, որոշ դեպքերում քիչ թե շատ տանելի վերաբերմունք ցուցաբերեն»:
Ստեփան Սաֆարյանը Վովա Գասպարյանին հորդորելով նշում է, թե, եթե ուզում է լավ առումով հիշվի հասարակության մեջ, ապա նման հայտարարություններ չպետք է հնչեն:
Հիշելով նախկին ոստիկանապետ Ալիկ Սարգսյանին` պարոն Սաֆարյանը նշեց, թե այն ժամանակ էլ նա էր կեսկատակ սպառնում հեղափոխությունը խեղդել օրորոցում, իսկ դրա հետևանքները ցավալիորեն տեսանք:
Տաթև ՀԱՐՈՒԹՅՈՒՆՅԱՆ
