Եվ տեղեկություններ է տարածում, որ Հայաստանում ներդրումներ անելը վստահելի չէ
«Ընդամենը 15 հազար եվրոյի պատվեր դիմաց գումար չփոխանցելու արդյունքում խոշոր կազմակերպություն հանդիսացող կազմակերպությունը հրաժարվում է Հայաստան գալ»,- այսօր՝ սեպտեմբերի 27-ին, լրագրողների հետ հանդիպման ընթացքում, անդրադառնալով Չեխիա կատարած այցին, հայտարարեց ԱԺ պատգամավոր Արծվիկ Մինասյանը:
Պատվիրակությունը մի քանի ժամ է վերադարձել է Չեխիայի մայրաքաղաք Պրահայից, որտեղ որ հանդիպումներ է ունեցել չեխ պաշտոնյանների եւ տեղի հայկական համայնքի հետ: Պատվիրակության անդամներն էին ԱԺ պատգամավորներ Մարգարիտ Եսայանը, Արծվիկ Մինասյանը, Տաճատ Վարդապետյանը, պատվիրակությունը ղեկավարում էր ԱԺ փոխնախագահ Էդուարդ Շարմազանովը:
Արծվիկ Մինասյանը հավելեց, որ այդ չեխական խոշոր կազմակերպությունը տարածում է տեղեկություն, թե Հայաստանում ներդրումներ կատարելը վստահելի չէ. «Եվ դա հայկական կողմի մի գործարարի անփութության պատճառով: Ո՛չ թե Հայաստանի ներդրումային միջավայրի, այլեւ գործարարի անպատասխանատու վերաբերմունքի պատճառով»:
Կարդացեք նաև
Նա չցանկացավ նշել այդ գործարարի անունը, սակայն հայտնեց, որ նա զբաղվում է ապակու արտադրությամբ: Արծվիկ Մինասյանը խորհուրդ տվեց այդ գործարարին, որպեսզի կատարի իր պարտավորությունը եւ վերացնի ձեւավորված թյուր կարծիքը, որպեսզի Հայաստանի հետ ներդրումային ծրագրերը մաքուր էջից սկսեն:
Ամի ՉԻՉԱԿՅԱՆ
