«Արամն այն մարդն է, որը ՀՀ անկախության հռչակագիրն է կարդացել: Նա խորհրդանիշ է: Վաղն էլ կարող են զինանշանը տփել, գցել օրինակի համար քացու տակ»,-լրագրողների հետ զրույցում ՀԱԿ խմբակցության քարտուղար Արամ Մանուկյանի հետ կատարված միջադեպին այսպիսի գնահատական տվեց ԲՀԿ խմբակցության պատգամավոր Գուրգեն Արսենյանը:
Թե որն է դրա պատճառը՝ նա ասաց. «Ենթադրում եմ, որ կարող է լինի քաղաքական գործունեության հետեւանք: Համոզված չեմ, փաստեր չունեմ, որ պնդեմ»:
Նա վստահեցրեց, որ երկրում անպատժելիություն կա: Թե դա ինչի՞ արդյունք է՝ նա պատասխանեց. «Ազատության»:
Հարցին՝ մտավախություն չունե՞ք, որ Ձեզ հետ էլ կարող են նման բան անել՝ նա պատասխանեց. «Ես իմ կենսագործունեությունը կառուցելուց կառուցում եմ որպես բանական, խոհեմ, հասարակության նորմալ անդամ: Եթե օրինակի համար նմանատիպ բան տեղի ունենա ինձ հետ, դա կոչվում է ֆորսմաժորային իրավիճակներ: Այդ դեպքում նորմալ, օրինապահ, օրինապաշտ քաղաքացու կարգավիճակից բնականաբար տեղափոխվում ես այլ կարգավիճակի»:
Կարդացեք նաև
Մեր հարցին՝ Ձեզ ինչքանո՞վ եք անվտանգ զգում, կարո՞ղ է թիկնապահներով շրջեք այսուհետեւ՝ նա պատասխանեց. «Ես միշտ իմ հետ ման եկող մի օգնական ունեմ: Միշտ»:
Հարցին՝ Ձեզ հետ շքամուտք մտնո՞ւմ է՝ Գուրգեն Արսենյանը պատասխանեց. «Դե գիտեք ինչ, ես առանձնատանն եմ ապրում, առանձնատուն մտնելուց եթե իմ բակում նմանատիպ միջոցառում տեղի ունենա, ուրեմն իմ տան որեւէ աշխատող պետք է դա անի, այն էլ ինչքան պետք է ես հոգին կերած լինեմ»:
Հռիփսիմե ՋԵԲԵՋՅԱՆ
