Ինչպես տեղեկացրել էինք, երեկ 50 կիլոգրամանոց ալյուրի գինը Գյումրիում հասել էր 20 հազար դրամի: Այսօր դոլարի փոխարժեքի նվազման հետ կապված այդ նույն քաշի պարկը շուկայում վաճառվում էր 17 հազար դրամով: Շաքարավազի գինը նույնպես նվազել էր՝ հասնելով 17 հազար դրամի՝ երեկվա 22 հազար դրամի փոխարեն: Հացի գինը ևս երեկվա համեմատ 170 դրամից իջել էր 150-ի:
Շաքարավազ ու այլուր վաճառողների հավաստմամբ, իրենք ևս տուժել են, քանի որ երեկվա դրությամբ մեծածախ առևտրով զբաղվողները իրենց վրա այս ապրանքատեսակները վաճառել են դոլարի կուրսով հաշվելով: Գյումրու շուկայում նույնն են մնացել մսի գները, մեկ կիլոգրամ տավարի միսը՝ 2900 դրամ է: Միսը աննկարագրելիորեն առատ է այս տարի: Շուկայի տարածքում կանգնող տաքսու վարորդների կատակելով, Գյումրու ամենաէժան ապրանքներն են՝ միսը, օղին, կանաչեղենն ու տաքսին: Բանն այն է, որ գյուղացիները, դոլարով վարկեր վերցնելով, հայտնվել են անելանելի իրավիճակում, խուճապի մատնվելով, համատարած մորթում են իրեն անասուններին, որ գոնե կարողանան արագ փակել վարկը:
Ժամը 13.00-ի դրությամբ Գյումրիում դոլարի առքը 455 դրամ էր, վաճառքը՝ 510, սա բանկերից մեկում: Իսկ կողքին գտնվող փոխանակման կետերում մի փոքր այլ գներ էին. վաճառքը՝ 490 դրամով էր իրականացվում, առքը՝ 450: Փոխանակման կետերից մեկի աշխատակիցը, խնդրելով չհրապարակել իր անունը, խստորեն քննադատեց Կենտրոնական բանկի նախագահին՝ ասելով, թե վերջինս իրեն «կերել, ոչնչացրել է, այլևս անելիք չունի»:
Այստեղից մեզ տեղեկացրեցին, որ դրամի դեֆիցիտ է նկատվում:
Բանկերից մեկում էլ նշեցին, որ վաղ առավոտից դոլար փոխանակողների հերթը կենտրոնական շուկայի սկզբնամասում գտնվող իրենց բանկից հասել է դեպի Գյումրու քաղաքապետարան. խուճապի մեջ հայտնվելով, վախենալով, որ դոլարի գինը նորից կնվազի, շատերը եկել ու դրամի են վերածել իրենց դոլարը:
Կարդացեք նաև
Գյումրեցիները, որոնք միշտ մեծ սիրով խոսում են տեսախցիկների առջև և անկաշկանդ արտահայտում իրենց կարծիքը, այսօր խորը դեպրեսիայի մեջ էին. համատարած խուսափում էին լրագրողներից, խնդրում չմոտենալ իրենց, չէին ուզում կես բառ անգամ արտահայտվել թանկացումների թեմայով: Մի քանիսը տեսախցիկից դուրս բողոքում էին, որ թեև դոլարն էլ էժանացավ, սակայն ապրանքների գները շարունակում են նույնը մնալ, բացարձակապես էժանացում չի նկատվում:
Խանութատերերն էլ իրենց հերթին նեղվում էին, որ հազիվ իրենց բիզնեսը հունի էր եկել, այս երկու օրվա ընթացքում այնպես քայքայեցին, որ առևտուրը լրիվ կանգնել է:
Դրսում կանաչի վաճառող մի տարեց կին էլ ասաց, որ կանաչիի գները նույնն են մնացել, կանաչին չի թանկացել, գնում է 80 դրամով, վաճառում՝ 100-ով, այսինքն իր եկամուտը 20 դրամն է, սակայն, ըստ տիկնոջ, իր 20 դրամն էլ այս պահին «Սերժ Սարգսյանն է ուտում»:
Մանրամասները՝ տեսանյութում
Նունե ԱՐԵՎՇԱՏՅԱՆ
դեֆիցիտ – պակաս
խանութատէր – խանութպան (հին, գեղեցիկ բառ ունենք) 🙂
ըշտը պա արմյանսկի խորաթա էնենք 🙂