Դեկտեմբերի 24-ին սահմանամերձ Ոսկեպար համայնքում տարեմուտի գեղեցիկ հանդես էր: Ոսկեպարցիները չէին հիշում, թե Հայաստանի անկախանալուց հետո, երբ էր գյուղի մշակույթի տան դահլիճում տոնական միջոցառում կայացել: Նախկինում ամանորի միջոցառումները տեղի են ունեցել միայն գյուղի դպրոցում: Ոսկեպարցիներին մեծ ուրախություն պարգեւեցին Նոյեմբերյանի քաղաքապետարանի մարզամշակութային կենտրոնի «Պարող կարապ» համույթը, պատանի երգիչներ: Սահմանագոտու մանուկներին ողջունեցին Ձմեռ պապն ու Ձյունանուշը: Տարեմուտի առթիվ համագյուղացիներին շնորհավորանքի եւ բարեմաղթանքի խոսք հղեց Ոսկեպարի գյուղապետ Երվանդ Եգանյանը: Գյուղի երեխաներին գյուղապետարանի կողմից ամանորի նվեր փաթեթներ հանձնվեցին: Ոսկեպարցի մանուկները ուրախությամբ պարի շրջան մտան, տարեմուտի թեմայով ասմունքեցին:
28-ամյա գյուղապետ Երվանդ Եգանյանի նախաձեռնությամբ վերջին 2 տարում Ոսկեպարում բազմաթիվ փոփոխություններ են եղել: 11 դոնորների աջակցությամբ համայնքային կենտրոնի հարակից տարածքում ստեղծվել է մանկական խաղահրապարակ: «Օրանժ» բջջային օպերատորի եւ «Շեն» բարեգործական հիմնադրամի միջոցով համայնքային կենտրոնում ստեղծվել, կահավորվել է 5 համակարգիչ ունեցող համակարգչային կենտրոն, ուր ոսկեպարցի երեխաները անվճար օգտվում են համացանցից: Համայնքի եւ Ոսկեպարի փոքր ՀԷԿ-ը շահագործող «Հ.Ա.Գ. եռյակ» ՍՊԸ-ի համաֆինանսավորմամբ գյուղի հիմնական մասում գիշերային լուսավորության ցանց է գործարկվել, գիշերները Ոսկեպարը լույսերից շողշողում է:
Ոսկան ՍԱՐԳՍՅԱՆ
Փրկությունն էլ Տավուշ հասնի Ոսկեպարով,
Ինչ խոսք նաև Ղարաբաղով…