2014 թվականն անբարենպաստ տարի էր Սյունիքի մարզի գյուղատնտեսության համար: Կապանի տարածաշրջանի մի շարք գյուղական համայնքներ գարնանը տուժել էին անբարենպաստ եղանակի պատճառով: Կարկտահարված համայնքների բնակիչները շարունակ ահազանգում էին իրենց այգիների կրած վնասների մասին եւ հուսահատ սպասում պետության աջակցությանը: «Այս տարի մեր գյուղի արտերը, ծառերը, բանջարաբոստանային կուլտուրաները մեծ վնասներ են կրել: Ամբողջ գյուղում ծառերին մի հատ միրգ չի մնացել, պոպոկի, տանձի, խնձորի, գիլասի, բալի երես չենք տեսել: Մայիս ամսին նորից բաղ ենք վարել, որ գոնե ձմեռվա հոգսն անենք»,- նշել էին Խդրանց գյուղի բնակիչները:
Կաղնուտում, Սեւաքարում, Խդրանցում, Շինուհայրում, Խոտում, Հալիձորում եւս անբարենպաստ եղանակն իր գործն էր արել: Տարին անբարենպաստ էր նաեւ Մեղրու տարածաշրջանի համար: Մեղրու Վահրավար գյուղի այգիների մրգատու ծառերի զգալի մասը դեռեւս մարտ ամսին տեղացած առատ ձյան հետեւանքով ցրտահարվել էր, եւ գյուղացիներն էլ զրկվել էին սպասված բերքից: Տեղացիների խոսքով` 100 տոկոսով վնասվել էր ծիրանը, հոնը, դեղձը, բալը, կեռասը, նուշը եւ այլն: Պատկերը նույնն էր Մեղրու տարածաշրջանի մի շարք այլ գյուղերում:
«2014թ. ամենավատ տարին է եղել, մի հատ բերք չի եղել ծառի վրա, որ մարդ պոկի ուտի: Հարյուրավոր ծառեր ունեմ մրգատու, ոչ մեկը մի հատ միրգ չի վերցրել, 2014 թվականն ամենաատելի թիվս է ինձ համար, մի լավ բան չեմ տեսել: 2015թ.-ին էլ, որ ծառերը բերք չվերցնեն, կրկին անգործության ենք մատնվելու, առանց սննդի ու բաղի բարիքների մնանք: Գոնե 2015թ.-ին լավ տարի լինի ու ծառերը բերք տան», -ասաց Կապանի բնակիչ Անուշավան Ղոնյանը` մաղթելով, որ 2015թ.-ը բերքառատ ու բարենպաստ տարի լինի հայության համար:
Մերի ՍՈՂՈՄՈՆՅԱՆ
