Նախախորհրդարանի անդամ Գեւորգ Սաֆարյանին ծեծի ենթարկելու դեպքով հարուցված քրեական գործը դեռ չի բացահայտվել:
Հիշեցնենք, որ նոյեմբերի 27-ին անհայտ անձինք Խանջյան փողոցում հարձակվել են «Նախախորհրդարանի» անդամ Գևորգ Սաֆարյանի վրա և կոշտ առարկայով հարվածել գլխին։ Նա հարվածից կորցրել է գիտակցությունը: Գևորգ Սաֆարյանը տեղափոխվել էր «Սուրբ Գրիգոր Լուսավորիչ» հիվանդանոց:
Գեւորգ Սաֆարյանը վստահ է, որ այդ գործը չի էլ բացահայտվի. «Ակնհայտ է, որ այդ գործը կփակվի, ռեժիմն իր անդամներին չի պատժում, իր արած հանցագործությունները չի բացահայտում»,- ասաց ակտիվիստը:
Նրա խոսքով, քննիչի ձեռքի տակ են դեպքը արձանագրած տեսագրությունները. «Սա այն դեպքն է, որ ակնհայտ հեշտ է բացահայտելը, որեւէ խնդիր չկա, կան երեք տեսախցիկներ, որոնք նկարում են տարածքը, տեսախցիկները բարձրորակ են, նույնիսկ մեքենայի համարներն են տեսնում շատ մեծ հեռավորությունից: Բացահայտելու խնդիր չկա, րոպեների հարց է: Եթե ուզեն՝ րոպեների ընթացքում կբացահայտեն»:
Կարդացեք նաև
Նախորդ տարեվերջին Նախախորհրդարանի անդամները նախազգուշացրել էին` Գեւորգ Սաֆարյանի վրա հարձակման դեպքով ու Նախախորհրդարանի մյուս անդամների մեքենաները հրդեհելու գործերով բացահայտումներ չլինելու դեպքում իրենք իրենց տեղեկություններն ու ուսումնասիրություններն են հրապարակելու: Գեւորգ Սաֆարյանից հետաքրքրվեցինք` ի՞նչ տեղեկությունների մասին էր խոսքը ու ե՞րբ են հրապարակվելու:
«Մենք որոշ տեղեկություն ունենք, դրա մասին այս պահին չենք հայտնի: Դեռ դրա մասին քննարկում չի եղել, էդքան էլ կարեւոր չէ իրականում: Բոլոր այս հանցագործությունները կբացահայտվեն միայն այս ռեժիմի տապալումից հետո»,- ասաց Գեւորգ Սաֆարյանը:
Մեր հարցին՝ մտավախություն չունի՞, որ երկար հետաքննությունից հետո պարզվի, թե իրեն հարվածողն էլ է «հայրենասիրական ապտակ տվել», ինչպես ԱԺ ՀԱԿ քարտուղար Արամ Մանուկյանին հարվածելու դեպքում եղավ, ակտիվիստը պատասխանեց. «Դեմագոգիա է, ոչ մի հայրենասիրության խնդիր չկա, պատճառաբանվեց` իբրեւ թե մեր նախագահին հայհոյանք հղելու համար էր, բայց հայրենասեր մարդը չի կարող Սերժ Սարգսյանին նախագահ համարել, որը տասնյակ մարդկանց արյան գնով զավթել է ժողովրդի իշխանությունը եւ հայրենասեր մարդը չի կարող Սերժ Սարգսյանին պաշտպանելու համար գնալ ու ինչ-որ մեկին ապտակել: Իմ վրա հարձակումը հատուկ ծառայությունների, ոստիկանության կողմից կազմակերպված ակցիա էր, որն ուղղված էր ինձ ու Նախախորհրդարանի անդամներին վախեցնելուն, որ մեր ուղուց հետ կանգնենք: Մենք էլ հետ չենք կանգնի: Կրկնում եմ` այդ հանցագործությունները կբացահայտվեն միայն ռեժիմի հեռանալուց հետո»:
Արփինե ՍԻՄՈՆՅԱՆ
