Հունվարի 27-ին ԵԱՀԿ Մինսկի խմբի համանախագահները Կրակովում հանդիպելու են Ադրբեջանի արտգործնախարար Էլմար Մամեդյարովին: Պայմանավորվածությունը ձեռք է բերվել երեկ: Կասկածից վեր է, որ հանդիպումը կապված է լինելու սահմանում իրավիճակի գերլարման հետ, որ իրականացնում է Ադրբեջանը դիվերսիոն հարձակումներով: Փաստորեն, հունվարին մենք ունեցանք այն, ինչ օգոստոսյան օրերին նախորդ տարի: Օգոստոսից հետո տեղի ունեցավ Սոչիում Պուտինի նախաձեռնությամբ Սարգսյան-Ալիև հանդիպումը, որից հետո իրավիճակը հանդարտվեց:
Ներկայումս Սարգսյան-Ալիև հանդիպման մասին խոսք չի գնում, թեև անցյալ տարի Փարիզում հոկտեմբերի 27-ին Ֆրանսուա Օլանդի հովանու ներքո տեղի ունեցած հանդիպումից հետո Ադրբեջանի արտգործնախարար Մամեդյարովը հայտարարեց, որ չի բացառվում առաջիկայում առաջանա նման նոր հանդիպման անհրաժեշտություն:
Հավանաբար Ադրբեջանի այդ ցանկությունը այնքան էլ մեծ ուշադրության չի արժանանում համանախագահների մոտ, և չի բացառվում, որ հենց սրանով է պայմանավորված նաև Ադրբեջանի ագրեսիվության աճը սահմաններում: Սակայն առայժմ Բաքուն ստանում է միայն Մինսկի խմբի համանախագահների մակարդակով ընդունելության հնարավորություն: Եթե, իհարկե, սա Բաքվի ցանկությանն ընդառաջ քայլ է, այլ ոչ թե Բաքվին պարզապես հրավիրում են պատասխան տալու իր արարքների համար:
Հրապարակումն ամբողջությամբ՝ «Ժամանակ» թերթի այսօրվա համարում:
