«Գործողությունները, որ Ադրբեջանն անում է, դրված են նրա վրա, որպեսզի շփման գծում լարվածություն ստեղծի»,- հունվարի 28-ին «Տեսակետ» մամլո ակումբում լրագրողների հետ հանդիպման ընթացքում, անդրադառնալով շփման գծում լարվածությանը, ասաց Արցախյան պատերազմի հերոս, գեներալ-մայոր Արկադի Տեր-Թադեւոսյանը (Կոմանդոս):
Նրա խոսքերով՝ մինչեւ Հայոց ցեղասպանության հարյուրերորդ տարելիցը շփման գծում լարվածությունը մեծանալու է. «Եթե առաջ նրանք կրակ վարում էին ինքնաձիգներից, այսօր կրակ են վարում ձեռքի նռնականետից, վաղը կրակ կվարեն ականանետից, վաղը չէ մյուս օրը՝ թնդանոթից: Այսինքն՝ շփման գծում անընդհատ լարվածությունը կմեծանա մինչեւ ապրիլի 24-ը»:
Արկադի Տեր -Թադեւոսյանի կարծիքով՝ ադրբեջանական հանրությունը պատերազմ չի ուզում, եւ այն զինվորները, որոնք կանգնած են հայ-ադրբեջանական սահմանին, նրանք չեն ուզում առաջ գնալ եւ Հայաստանի դեմ պատերազմել. «Հյուսիսային Կիպրոսում եւ Թուրքիայում հատուկ ջոկատներ են պատրաստվում: Եվ զինվորներին ներքաշելու համար այդ ջոկատներն են գործում շփման գծում»:
Ամի ՉԻՉԱԿՅԱՆ
