«Ճանապարհային ոստիկանության գերխնդիրը մնում է ճանապարհային երթեւեկության անվտանգությունը»,- փետրվարի 2-ին լրագրողների հետ հանդիպման ընթացքում հայտարարեց «Ճանապարհային ոստիկանություն» ծառայության պետ, ոստիկանության գեներալ-մայոր Արտակ Հարությունյանը:
Նրա խոսքերով՝ 2014 թվականի ընթացքում գրանցվել է 3156 ճանապարհատրանսպորտային պատահար, որի ընթացքում զոհվել է 297, մարմնական վնասվածք է ստացել 4479 մարդ:
Պարոն Հարությունյանը նշեց, որ 2013 թվականի համեմատությամբ ճանապարհատրանսպորտային պատահարների եւ մարմնական վնասվածքների աճ է գրանցել, իսկ զոհերի թիվը նվազել է 19-ով. «Նախորդ մի քանի տարիների վիճակագրական շարժընթացը ցույց է տալիս, որ մենք տարեցտարի ճանապարհատրանսպորտային պատահարների զգալի նվազում ենք գրանցում, այսինքն՝ շարժընթացի մեջ մենք դրական միտում ունենք: Անչափահասների մասով գրեթե նույն վիճակն է արձանագրվել, այսինքն՝ ունենք ճանապարհատրանսպորտային պատահարների աճ, մարմնական վնասվածքների աճ եւ զոհերի նվազում»:
Պարոն Հարությունյանը նշեց, որ 2014 թվականի ընթացքում երթեւեկության արագության գերազանցման խախտմամբ գրանցվել է 28 812 խախտում, նախորդ տարվա 3923-ի դիմաց, ոչ սթափ վարելու 3466 դեպք է գրանցվել, նախորդ տարվա 2745-ի դիմաց: Նա հավելեց, որ 2014 թվականի ընթացքում խախտումների համար 3 միլիարդ հարյուր միլիոն դրամ գումար է մուծվել, որը նախորդ տարվա համեմատ մի փոքր քիչ է, իսկ տեխնիկական սարքերով գրանցված խախտումների համար 8.5 միլիարդ դրամ է մուծվել:
Կարդացեք նաև
Ամի ՉԻՉԱԿՅԱՆ