«Երաժշտություն հանուն խաղաղության» միջազգային բարեգործական նախագծի երաժիշտներն արդեն Հայաստանում են և փետրվարի 4-ին՝ ժամը 19:00-ին, Կոմիտասի անվան կամերային երաժշտության տանը հանրությանը կներկայանան իրենց համերգային ծրագրով:
«Երաժշտություն հանուն խաղաղության» միջազգային բարեգործական նախագծի համերգին մասնակցում են միջազգային մի շարք մրցույթների դափնեկիր երաժիշտներ՝ դաշնակահարուհի Մարիա Նեմցովա (Ռուսաստան), սաքսոֆոնահար Վիտալի Վատուլյա (Ռուսաստան) և ուրիշներ: Համերգին ելույթ կունենան նաև ռուս երիտասարդ սաքսոֆոնահարներ Եվգենի Նովիկովը և Դմիտրի Ուվարովը, որոնք իրենց երաժշտական գործունեությունը ծավալում են Եվրոպայում, ինչպես նաև արգենտինացի սաքսոֆոնահար Խուան Մանուել Դոմինգեսը:
Երեկոյի ընթացքում կհնչեն Բախի, Բրամսի, Շումանի, Գրիգի, Չայկովսկու, Կոմիտասի, Խաչատրյանի ստեղծագործությունները:
«Երաժշտություն հանուն խաղաղության» նախագծի մասնակիցները համերգներով ու վարպետության դասընթացներով հանդես կգան նաև Էջմիածնում և Ստեփանակերտում:
Կարդացեք նաև
Այս մասին այսօր լրագրողների հետ հանդիպման ժամանակ ասաց Արամ Խաչատրյանի տուն-թանգարանի տնօրեն, Խաչատրյանի անվան տրիոյի դաշնակահարուհի Արմինե Գրիգորյանը՝ տեղեկացնելով նաև, որ նախագիծն արդեն երկրորդ անգամ է Հայաստանում իրականացվում: Իսկ բարեգործական համերգի կազմակերպիչն ու Հայաստան հրավիրող կողմը Արամ Խաչատրյանի անվան տրիոն է և Դասական երաժշտության զարգացման հիմնադրամը:
Նախագծի համահիմնադիր, դաշնակահարուհի Մարիա Նեմցովայի տեղեկացմամբ՝ նախագիծն արդեն չորս տարեկան է: Այդ ընթացքում հասցրել են լինել մոտ 15 երկրներում: «Երաժշտություն հանուն խաղաղության» միջազգային բարեգործական նախագծի նպատակը հակամարտության գոտիներում բնակվող երիտասարդ երաժիշտներին աջակցելն ու երաժշտության միջոցով միջմշակութային համագործակցությունը զարգացնելն է,- ասում է Մ. Նեմցովան,- նախագիծը քաղաքական որևէ ենթատեքստ չունի: Մեզ համար կարևորը մարդկանց հետ շփումն է, երաժշտության միջոցով հաղորդակցվելը»:
«Երաժշտությունը սահմաններ չի ճանաչում,- իր հերթին նկատեց նախագծի համահիմնադիր, սաքսոֆոնահար Վիտալի Վատուլյան,- կարևոր չէ՝ ինչ լեզվով ենք խոսում, ինչ կրոն ենք դավանում: Երաժշտությունը սրտից սիրտ է անցնում»:
Ինչպես տեղեկացրեց Մ. Նեմցովան, նախագծի շրջանակներում իրենք կընտրեն երկու հայ մասնակցի՝ Մոսկվայում եզրափակիչ համերգին մասնակցելու համար: 2012 թ.՝ երևանյան նախորդ այցելության ժամանակ, նրանց կողմից ընտրվել են երկու հայ երաժիշտ՝ դաշնակահարուհի Անահիտ Առուշանյանը և սաքսոֆոնահար Արթուր Քոչարյանը, որոնք նույնպես կմասնակցեն երևանյան համերգին:
Ի դեպ, համերգի մուտքն ազատ է:
Սիրանուշ ՀԱՅՐԱՊԵՏՅԱՆ