Տասնամյակներ շարունակ հայ մշակույթը աշխարհին ներկայացել է իր այցեքարտերով՝ խաչքարերից մինչեւ շարականներ, մանրանկարչություն ու դուդուկ, Կոմիտաս, Խաչատրյան, Սարյան, Գոհար Գասպարյան, Սվետլանա Նավասարդյան, Կոմիտասի անվան լարային քառյակ: Իբրեւ այցեքարտ եւ պատվանուն (բրենդ) է հանդես գալիս նաեւ Հայաստանի պարի պետական անսամբլը:
«Առավոտի» հետ զրույցում Պարի պետականի տնօրեն Էրիկ Չանչուրյանը (լուսանկարում) նշեց, որ կոլեկտիվը ի սկզբանե աշխարհի տարբեր հեղինակավոր բեմերում պարի լեզվով պրոպագանդել է մեր լեգենդներն ու ասքերը, որոնք ազգի յուրօրինակ տարեգրությունն են ու արտահայտում են նրա անցյալը, ներկան, մաքառումները, երազանքներն ու ձգտումները: Մեր զրուցակիցը նշեց, որ այս տարվա երեւանյան առաջին համերգը կկայանա «Առնո Բաբաջանյան» համերգասրահում, փետրվարի 27-ին, այնուհետեւ Պարի պետականին տարվա ընթացքում սպասվում է հյուրախաղերով խիտ գրաֆիկ՝ Արաբական Էմիրություններ, Գերմանիա, Իսպանիա եւ այլն: Պարոն Չանչուրյանը հավաստիացրեց, որ խիտ գրաֆիկը վերաբերում է նաեւ հայաստանյան մարզերում՝ անսամբլի համերգներին:
«Մեր անսամբլի գլխավոր բալետմայստեր Ասատուր Կարապետյանը մտահղացում ունի համերգային ծրագրերում ընդգրկել ոչ միայն պարային համարներ, այլեւ մինի պարային պատմություններ՝ ներկայացումների տեսքով»,- հայտնեց Էրիկ Չանչուրյանը:
Պարի պետականի տնօրենը հիշեց անցյալ տարի Արցախում կայացած ազատ մուտքով համերգը. «Ի՜նչ ոգեւորություն էր տիրում… Չի բացառվում, որ նման համերգներ ունենանք նաեւ արտերկրյա ուղեւորությունների ժամանակ: Նպատակը օտարներին հայի տեսակը ներկայացնելն է»:
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
11.02.2015
