«Ես առաջին նախագահից ավելին էի սպասում, քան հոդված, գրառում: Առաջին նախագահից կսպասեի, թե կոնկրետ ինչ լուծումներ է տեսնում»,- Aravot.am-ի հետ զրույցում, անդրադառնալով առաջին նախագահ Լեւոն Տեր-Պետրոսյանի բաց նամակին, ասաց Երեւանի մամուլի ակումբի նախագահ Բորիս Նավասարդյանը:
Նրա կարծիքով՝ այդ բաց նամակի հեղինակ կարող էր լինել ներքաղաքական զարգացումների վրա ավելի փոքր ազդեցություն ունեցող մարդ, ոչ առաջին նախագահը. «Այդ կապակցությամբ առաջանում են հարցեր՝ ինչքանո՞վ է դա համաձայնեցված այլ ընդդիմադիր ուժերի եւ նրանց առաջնորդների հետ, որպեսզի այդ առաջարկը, որը պատրաստվում էր Լեւոն Տեր-Պետրոսյանն անել Սերժ Սարգսյանին, եթե համաձայնեցված չէ, ապա ինչքանով է այն լուրջ: Դա խոսում է նրա մասին, որ կան հարցեր, որտեղ Լեւոն Տեր-Պետրոսյանը պատրաստ է երկկողմանի սեպարատ երկխոսության իշխանությունների հետ՝ առանց դա համաձայնեցնելու եռյակի գործընկերների հետ: Շատ կարեւոր կլիներ, որ մինչեւ հետագա ներքաղաքական զարգացում այս հարցերը պատասխան ունենան»:
Բորիս Նավասարդյանը համարում է, որ ավելի ճիշտ կլիներ առաջարկությունը հնչեցնել եւ մտնել երկխոսության մեջ եւ այնուհետեւ քննադատեր Համահայկական հռչակագիրը. «Հռչակագրի քննադատությունն ավելի շուտ ստացվեց, քան երկխոսության առաջարկությունը, դա տարօրինակ է, որովհետեւ սուր քննադատության ես ենթարկում, հետո նոր առաջարկում երկխոսության մեջ մտնել: Բնականաբար, երկխոսությունը, առավել եւս՝ կառուցողական երկխոսությունը ավելի է դժվարանում: Եթե կային գաղափարներ, մտքեր, այլ կարծիքներ, բաց նամակը պետք է սկսվեր երկխոսության առաջարկությունից, ոչ թե քննադատությունից»:
Ամի ՉԻՉԱԿՅԱՆ
