Թուրքիայի Հանրապետությունը մայիսի 3-ին Լեռնային Ղարաբաղում անցկացվելիք խորհրդարանական ընտրությունները սադրանք է անվանել: Այս մասին հայտնում է ադրբեջանական APA.az գործակալությունը:
Գործակալության հարցմանն ի պատասխան հայտնել են, որ այս ընտրությունները փորձեր են օրինականացնելու անօրինական իրավիճակը, որը տիրում է այդ տարածքներում. «Այսպիսի նախաձեռնությունները նշանակում են միջազգային իրավունքի, ՄԱԿ-ի անվտանգության խորհրդի բանաձեւերի եւ ԵԱՀԿ-ի սկզբունքների բացահայտ խախտում: Այն ժամանակ, երբ ԵԱՀԿ-ի շրջանակներում հակամարտության խաղաղ կարգավորման բանակցություններ են ընթանում, այդպիսի անօրինական «ընտրությունների» անցկացումը հակամարտության կարգավորմանը չի նպաստի»:
Թուրքիայի ԱԳՆ խստորեն դատապարտում է այս գործողությունները, քանի որ «դրանք ուղղված են հերթական անգամ խախտելու Ադրբեջանի ինքնիշխանության եւ տարածքային ամբողջականության իրավունքը» եւ հայտարարում է, որ նրանք անօրինական են եւ միջազգային իրավունքի հետ որեւէ առնչություն չունեն:
Պատրաստեց Աշոտ ԻՍՐԱԵԼՅԱՆԸ
