Գյումրիի Վարդանանց հրապարակում, քաղաքապետարանի դիմաց բողոքի ակցիայի են դուրս եկել Գյումրու տաքսու վարորդները՝ կապված լիցենզավորման կարգում կատարված նոր փոփոխությունների հետ: Նրանք պնդում են, որ նոր փոփոխություններով, համաձայն որի, հաշվիչ սարք պետք է տեղադրեն մեքենաներում եւ ամեն ամիս ֆիքսված գումար մուծեն պետությանը, իրենք սովամահ կլինեն:
«Գյումրի մարդ է մնացե՞լ, որ օրվա հացի փողը ուզում եք խլել: Սերժիկ, մինչեւ հիմա ի՞նչ ես արել մեզ համար, որ անցել ես թալանի»,- ասում են վարորդները: Նրանք վստահ են, որ հաշվիչ սարքերի տեղադրումը ինչ-որ մեկի բիզնեսն է եւ կասկածներ ունեն , որ դա հենց Սերժ Սարգսյանի եղբոր բիզնեսն է:
Միայն հաշվիչ սարքի տեղադրումը, ըստ վարորդների, իրենց վրա կնստի 70.000 դրամ: Նրանց հետ բանակցում է Շիրակի մարզի փոխոստիկանապետ Աշոտ Գրիգորյանը: Նա առաջարկեց խումբ կազմել եւ գնալ Շիրակի մարզպետարան՝ այնտեղ ներկայացնելու իրենց պահանջները: Սակայն վարորդները տեղներից դեռ չեն շարժվում:
Կարդացեք նաև
Որոշ ժամանակ անց 4 վարորդներ գնացին ու հանդիպեցին Շիրակի մարզպետ Ֆելիքս Ցոլակյանի հետ: Մարզպետը նրանց խոստացավ հանդիպում կազմակերպել տրանսպորի եւ կապի նախարարության աշխատակիցների հետ: Մարզպետը, նրանց ճանապարհելով, արագ պայմանավորվածություն ձեռք բերեց վերոհիշյալ նախարարության հետ, վերջիններիս ներկայացուցիչները երկուշաբթի կգան Շիրակի մարզպետարան՝ լսելու գյումրեցի վարորդների բողոքը: Չի բացառվում, որ Գյումրի ժամանի հենց տրանսպորտի ու կապի նախարար Գագիկ Բեգլարյանը: Մինչ վարորդների 4 հոգանոց խումբը դուրս էր գալիս Շիրակի մարզպետի առանձնասենյակից՝ քաղաքապետարանի մոտ բողոքի ակցիա անցկացնող վարորդները պատրաստվում էին գնալ ու փակել Գյումրի-Երեւան մայրուղին:
«Նման բան մի արեք, ամոթ է, պայմանավորվեցինք մարզպետի հետ, եթե մեր պահանջը արագ չբավարարեն, մենք՝գյումրեցիներս, այլեւս կորցնելու բան չունենք, ինչ մեթոդներով պետք լինի կբողոքենք»,- ասացին վարորդական պատվիրակախմբի անդամները: Նրանք վերադարձան Վարդանանց հրապարակ՝ իրենց գործընկերներին հորդորեցին հանդարտվել մինչեւ երկուբաբթի: Մոտ 1,5 ժամ տեւած բողոքի ակցիան ավարտվեց տաքսիների ազդանշանների ներքո:
Նունե ԱՐԵՎՇԱՏՅԱՆ
