Չինական մշակույթի ու գիտության կենտրոնի տնօրեն Իզաբելլա Մուրադյանի տվյալներով, հին ազգերից այսօր վեցն են մնացել, ու չինացիները, հայերը հին ազգերի շարքից են: Նա վկայակոչեց 4-րդ դարից մեզ հասած գրավոր ապացույցները՝ հայ-չինական տնտեսական հարաբերությունների մասին: Ըստ կենտրոնի տնօրենի, հայ-չինական հարաբերությունները բարձր մակարդակի են եղել:
Ըստ նրա, Չինաստանն ու Հայաստանը պետք է խորացնեն հարաբերությունները, համագործակցության եզրերն ընդլայնեն: Օրինակ, ըստ նրա, Հայաստանի ջրային ռեսուրսները ավելի մեծ են քան Չինաստանինը. «Հատկապես, եթե հաշվի առնենք, որ 40 տարի հետո նավթային պատերազմները փոխարինվելու են ջրային պատերազմներով»:
Նա նկատեց, որ Հայաստանում բացակայում են չինական բանկերը, որոնք վաղուց գործում են Բաքվում, Վրաստանում ու այլ երկրներում: Չինական բանկերը, ըստ նրա, այլ երկրներում ֆինանսավորում են ճանապարհների նորոգման աշխատանքներ: Իզաբելլա Մուրադյանի խոսքով, Չինաստանում հայկական համայնքը փոքր է՝ 500 հոգի են:
Քաղաքագետ Սերգեյ Շաքարյանն էլ ասաց, որ այնպես չէ՝ Հայաստանում էլ չկան ուղեղներ, ու բոլոր ուղեղները արտասահման են մեկնել. «ԱՄՆ-ի դաշնակիցները հարում են դեպի Չինաստան՝ հասկանալով, որ նման հարեւանի հետ պետք է հաշվի նստել»:
Կարդացեք նաև
Նա ասաց նաեւ, որ Չինաստանը կարող է ֆինանսավորել Հայաստան-Իրան երկաթգծի կառուցման աշխատանքները. «Չինաստանը տասը տարուց ավելի մասնակցում է մեր օբյեկտների կառուցմանը, ավելի ճիշտ կլինի, եթե փորձենք չինական փորձը կիրառել՝ ստեղծելով հայերի համար աշխատատեղեր: Իսկ Չինաստանի միջոցով մենք ձեռք ենք բերել բավականին հետաքրքիր սպառազինություններ»:
Իսկ Իզաբելլա Մուրադյանն ասաց, որ Հայաստանում այսօր գործում են 40–ից ավելի չինական կազմակերպություններ, ու Չինաստանը հետաքրքրված է տարբեր երկրներում ներդրումներ անելու հարցում:
Արփինե ՍԻՄՈՆՅԱՆ
