Քիչ առաջ ՀՀ ոստիկանապետ Վլադիմիր Գասպարյանի հրամանով պաշտոնազրկվեց Շիրակի մարզի ոստիկանապետ, գնդապետ Վարդան Նադարյանը: Նշենք, որ գնդապետը ՀՀ ոստիկանապետի մոտ ընկերն է և նրան կադրերի ռեզերվ ուղարկելը փոքր-ինչ անսպասելի էր: Վարդան Նադարյանը մեր հեռախոսազանգերին չպատասխանեց, որ մեկնաբանություն ստանայինք նրանից այս թեմայով:
ՀՀ ոստիկանության լրատվության եւ հասարակայնության հետ կապերի վարչության պետ Աշոտ Ահարոնյանը ևս չմեկնաբանեց, թե ինչու են պաշտոնազրկել Շիրակի ոստիկանապետին, միայն նշեց, որ փոփոխությունները ոստիկանական համակարգում պարբերական բնույթ են կրում:
Նա տեղեկացրեց, որ Շիրակի մարզ են ուղարկել Արաբկիրի ոստիկանապետ Գրիշա Ամիրխանյանին: Նրան բնութագրում են որպես հին կադր: Նկատենք, որ Վարդան Նադարյանը Շիրակի ոստիկանապետի պաշտոնը զբաղեցրեց մոտ 1,5 տարի: Վերջին շրջանում արտառոց կրիմինալ դեպքեր էին տեղի ունենում մարզում, իսկ նախորդ շաբաթ Գյումրու թատերական հրապարակում ոստիկանների ներկայությամբ դանակահարեցին Հիմնադիր խորհրդարանի անդամ Հրաչիկ Միրզոյանին:
Սա առանձնակի քննադատության թեմա դարձավ գյումրեցիների մոտ, որը և ամենայն հավանականությամբ պատճառ դարձավ, որպեսզի վերջինիս պաշտոնազրկեին: Շիրակի մարզային ոստիկանությունից տեղեկացանք, որ Վարդան Նադարյանը, հավաքելով իր իրերը, արդեն հեռացել է, իսկ նոր ոստիկանապետը կոլեկտիվին կներկայանա ամենայն հավանականությամբ վաղը:
Կարդացեք նաև
Նունե ԱՐԵՎՇԱՏՅԱՆ
ռեզերվ – պահուստ
կրիմինալ – քրէական
կոլեկտիվ – աշխատակազմ
Յ.Գ. Կոլեկտիվ բառից խորհրդային նաւթալինի հոտ է գալիս: Թարգէք, ի սէր Աստուծոյ:)