Աստվածաբան Վարդան Խաչատրյանը կարևորում է մեր պատմության «սպիտակ էջերի» լուսաբանումը: Խոսքը գոյություն ունեցող այն խնդիրների մասին է, որոնք մինչև օրս չեն լուսաբանվել, գիտական շրջանակներում չեն քննարկվել՝ հասարակության գիտակցության մեջ դառնալով այսպես կոչված՝ սպիտակ էջեր:
«18-19-րդ դարերի սահմանագլխին ձևավորված թուրքական գրականության մեջ հայի կերպարը խիստ բացասական է, ատելի և շրջանցվող»,- ասում է Վարդան Խաչատրյանը:
Թե ինչու է այդպես, աստվածաբանն ասում է, որ դրա վերաբերյալ մենք այսօր չունենք բացատրություն, և դա, նրա կարծիքով, մեր պատմության «սպիտակ էջերից», լրջագույն բացթողումներից մեկն է:
«Դրա լուսաբանումը շատ կարևոր է, քանի որ խոսքը նվաճողի, խլողի և նախկին տիրոջ միջև եղած վերաբերմունքի մասին է, որը և հասունացրել է Հայոց ցեղասպանությունը»,- ասում է նա:
Կարդացեք նաև
Վ. Խաչատրյանը «սպիտակ էջերից» է համարում նաև թուրքերի ու գերմանացիների հարաբերությունները, նրանց փոխթափանցվածության աստիճանը:
«Սա մինչև այսօր առկախված հարց է: Գալիպոլիի ճակատամարտին գործ են ունեցել թուրք-գերմանական անձնակազմի հետ: Թե ի՞նչ է այն իրենից ներկայացնում, ովքե՞ր են այդ մարդիկ, ովքե՞ր են այդ ականային դաշտի ձևավորողները, շատ քիչ է ուսումնասիրված, ինչպես որ ուսումնասիրված չէ, թե ինչու աշխարհի համար դա եղավ այդքան հանկարծակի»,- ասաց Վ. Խաչատրյանը՝ ընդգծելով, որ մեր պատմության «սպիտակ էջերը» մեկ-երկուսը չեն. դրանք բազմաթիվ են:
Սիրանուշ ՀԱՅՐԱՊԵՏՅԱՆ
