Թբիլիսիում ավարտված ծանրամարտի տղամարդկանց եւ կանանց Եվրոպայի առաջնությունում Հայաստանը երկամարտում նվաճեց 1 ոսկե, 1 արծաթե եւ 1 բրոնզե մեդալ:
«Առավոտի» հետ զրույցում մեր ընտրանիների ընդհանուր մասնակցությունը գնահատում եւ անելիքները ներկայացնում է Հայաստանի ծանրամարտի ֆեդերացիայի փոխնախագահ Վահան Խեչանյանը:
– Գո՞հ եք մեր հավաքականների ցույց տված արդյունքներից:
– Ընդհանուր առմամբ՝ մասնակցությունը գնահատում եմ լավ: Եթե նկատի առնենք, որ վերջին տարիներին մենք Եվրոպայի չեմպիոն չունեինք, Տիգրան Մարտիրոսյանի նվաճած ոսկին անխոս առաջընթաց քայլ է: Անցած տարվա երկու արծաթե մեդալներից մեկը վերածվեց ոսկու: Իսկ մեր ծանրորդների նվաճած ընդհանուր ութ մեդալները (2 ոսկե, 4 արծաթե, 2 բրոնզե) 40-ից ավելի երկրների պայքարում վատ ցուցանիշ չէ: Թեեւ, կրկնում եմ, ավելիին էի սպասում: Բայց սպորտն անկանխատեսելի է հաճելի եւ տհաճ անակնկալներով:
Կարդացեք նաև
– Մենք բոլորս ուղիղ հեռարձակմամբ հետեւում էինք մեր մարզիկների մրցելույթներին: Ու տեսանք, որ հույսերն ավելի շատ արդարացրին ամենափորձառուները:
– Դա եւ ուրախացնող փաստ է, եւ հուսադրող: Ուրախացնող է, որ Տիգրան Մարտիրոսյանը, որը երկար ժամանակ վնասվածքներից ապաքինվելու պատճառով ոչ միայն մրցումների չէր մասնակցում, այլեւ՝ մարզումների, համառության ու նպատակասլացության շնորհիվ երեք-չորս ամսում կարողացավ մարզավիճակ ձեռք բերել եւ վերադարձնել Եվրոպայի ոսկին՝ դառնալով Հին Աշխարհամասի եռակի չեմպիոն: Ուրախացնում է Հռիփսիմե Խուրշուդյանը, որը մայր դառնալուց հետո իր խոստմանը հավատարիմ՝ վերադարձել է մեծ սպորտ եւ մրցումից-մրցում ավելացնում է բարձրացվող կիլոգրամները, վստահությունը վերականգնում: Նույնը վերաբերում է Սմբատ Մարգարյանին եւ Անդրանիկ Կարապետյանին: Մյուսներն էլ, բացի Աղասի Աղասյանից, միավորներ բերեցին թիմային հաշվարկին:
– Երիտասարդ ծանրորդների մասին ի՞նչ կասեք:
– Նրանցից էլ ակնկալիքներն ավելի մեծ էին: Բայց արեցին այն, ինչ այդ պահին կարողացան: Անդրանիկ Կարապետյանը դեռ 20 տարեկան է, Սիմոն Մարտիրոսյանը՝ 18, Իզաբելլա Յայլյանը՝ 20: Նրանք աճելու տեղ դեռ ունեն ու իրենց դեռ ցույց կտան:
– Նկատի ունեք մինչեւ աշխարհի առաջնությո՞ւնը:
– Նաեւ օլիմպիական խաղերը:
– Աշնանը կայանալիք աշխարհի առաջնությունում վերջնականապես որոշվելու է, թե Հայաստանը Ռիո դե Ժանեյրոյի օլիմպիական խաղերում քանի՞ ծանրորդով հանդես կգա: Ձեր կանխատեսումները:
– Անցած տարվա արդյունքներով մենք օլիմպիական խաղերում ունենք տղամարդկանց՝ 5, կանանց՝ 2 տեղ: Մեր նպատակն այս տարի տղամարդկանց հինգ տեղերը պահպանելն է, իսկ կանանց համար վերջնահաշվարկում մեկ տեղ ավելացնելը:
– Դրա համար ի՞նչ է հարկավոր անել:
– Աշխարհի առաջնությունում առավելագույն վարկանիշային միավորներ վաստակել: Իսկ դրա համար ֆեդերացիայի նախագահ Արմեն Շահազիզյանը ոչինչ չի խնայելու: Ուսումնամարզական հավաքները, որ կազմել ու հաստատել է ֆեդերացիան, կանցկացվեն ամենաբարձր մակարդակով: Ավելին ասեմ. նախատեսել եւ այդ ուղղությամբ արդեն աշխատում ենք, որպեսզի այս տարվա աշխարհի առաջնության նախապատրաստության եզրափակիչ հավաքը կազմակերպենք ԱՄՆ-ում, քանի որ ծանրորդների կլիմայափոխությունը վճռորոշ դերակատարություն է ունենալու: Իսկ մինչ այդ, աշխարհի առաջնության եւ օլիմպիական խաղերի թեկնածուները կգտնվեն լիարժեք հավաքներում, մի քանիսը կմասնակցեն միջազգային պաշտոնական մրցումների ու այնտեղ «ետ կբերեն» այն մեդալները, որոնք չնվաճվեցին Եվրոպայի այս առաջնությունում:
ԱՇՈՏ ՀԱԿՈԲՅԱՆ
«Առավոտ» օրաթերթ
25.03.2015
