«Ադրբեջանական հակերները շատ օգտակար են հայկական համացանցը ճանաչելու համար»,-անդրադառնալով այս օրերին տեղի ունեցած ադրբեջանական, թուրքական հակերային հարձակումներին՝ ասաց տեղեկատվական անվտանգության մասնագետ Սամվել Մարտիրոսյանը: Ըստ նրա, երբեմն այդ կայքերը կոտրելուց հետո ես իմանում, որ այդպիսի կայք գոյություն ունի:
Ամերիկյան հայազգի հեռուստաաստղ Քիմ Քարդաշյանի, «System of a down» հանրահայտ ռոք խմբի, Ցեղասպանության 100-ամյա տարելիցի առիթով մեր երկիր ժամանած տարբեր երկրների նախագահների այցի մասին տեղեկատվությունը Google-ում եւ սոցիալական ցանցերում ամենաբարձր հորիզոնականներում են հայտնվել: Ըստ պարոն Մարտիրոսյանի, այս օրերին Google-ում Հայաստանի նկատմամբ հետաքրքրությունը 2-ից 4 անգամ մեծացել է: Տեղեկատվական անվտանգության մասնագետը հստակ թվեր չնշեց` ասելով, որ արդյունքները կամփոփվեն միայն այս ամսվա վերջում:
Սամվել Մարտիրոսյանի համար միանգամայն սպասելի էր այդպիսի հարձակումը, սակայն պարոն Մարտիրոսյանը վստահեցրեց, որ հայկական ոչ մի լուրջ կայք առանձնապես չի տուժել, քանի որ մեր մասնագետները տեղը տեղին պատրաստվել են եւ բացի այդ մեր կայքերի անվտանգությունը բարձր մակարդակի վրա է: Կառավարական կայքերը, Հայոց ցեղասպանության 100-րդ տարելիցի պաշտոնական կայքը նույնպես ենթարկվել են հակերային հարձակման, սակայն չեն տուժել:
Մասնագետի տվյալներով, մոտավորապես 250 կայք են կոտրել. «Հայկական կողմը շատ ուժեղ պատրաստվել էր, բոլորը սպասում էին նման հարձակումներին եւ ճիգեր էին գործադրել, տեղեկատվական հիմնական կայքերը լուրջ պաշտպանված էին»,-ասաց նա եւ նշեց, որ շատ կարեւոր է, որ փաստացի չկարողացան խոչընդոտել տեղեկատվական հոսքերը: Միանշանակ կարելի է ասել, որ պաշտպանությունը ուժեղ էր եւ այստեղ հաղթող ենք»:
Կարդացեք նաև
Պարոն Մարտիրոսյանը նշեց, որ այս անգամ ի պատասխան, հայկական հակերային խմբերը շատ ագրեսիվ են գործել: Նրա համոզմամբ, այս օրերին թուրքական քարոզչությունը ճգնաժամի մեջ է: Պարոն Մարտիրոսյանի կարծիքով այժմ մեր խնդիրը տեղափոխվել է մեկ այլ դաշտ` քաղաքական եւ դիվանագիտական, այսինքն` արդյոք այլ երկրները պատրաստ են Թուրքիայի հետ հարաբերությունները վտանգելու` ճանաչել Ցեղասպանության հարցը:
Լուսինե ԲՈՒԴԱՂՅԱՆ
