Սյունիքի մարզի ընդհանուր իրավասության դատարանի կողմից անցյալ տարվա դեկտեմբերի 22-ին Գևորգ Թոսունյանը դատապարտվել էր տասներկու տարվա ազատազրկման, մեղավոր էր ճանաչվել ՀՀ քրեական օրենսգրքի 104 հոդվածի 2-րդ մասի 7-րդ կետով եւ 258 հոդվածի 3-րդ մասի 1-ին կետով:Այն է՝ ծանրացուցիչ հանգամանքներում կատարված սպանության եւ խմբակային խուլիգանության:
Պաշտպանական կողմը դատավճռի դեմ վերաքննիչ բողոք էր բերել այս տարվա հունվարի 22-ին: ՀՀ վերաքննիչ դատարանում նշանակվել էր գործի քննությունը դատավորներ Կարինե Ղազարյան, Մխիթար Պապոյան, Վազգեն Ռշտունի կազմով:
Aravot.am-ին այսօր Գեւորգ Թոսունյանի պաշտպանը՝ ՀՀ փաստաբանների պալատի անդամ Վահագն Մանուկյանն ասաց, որ վերաքննիչ դատարանը դատավճիռը մասնակի բեկանել է եւ Գեւորգ Թոսունյանին մեղավոր է ճանաչել ՀՀ քրեական օրենսգրքի 112 հոդվածով՝ դիտավորությամբ ծանր մարմնական վնասվածք հասցնելու համար:
Հիշեցնենք, որ Գ.Թոսունյանը եւ այլք մեղադրվել էին 2010թ.օգոստոսի 28-ին Քաջարանի սրճարաններից մեկում Գրիգոր Պապյանի մահվան փաստի առթիվ:
Կարդացեք նաև
Ի դեպ, մայիսի 6-ին Սյունիքի մարզի ընդհանուր իրավասության դատարանում կշարունակվի բարձրաստիճան պաշտոնատար անձանց, նախկին իրավապահների դեմ հարուցված քրեական գործով դատական նիստը.նրանք մեղադրվում են ակնհայտ կեղծ ապացույցների հիման վրա Գրիգոր Պապյանի գործը այլ հետքի վրա գցելու, վկաների վրա ազդելու համար:
Ռուզան ՄԻՆԱՍՅԱՆ
Վերջապես!!! 3 տարվա չարչարանքներից, արդարությունը վերականգնելու ջանքերից հետո ստացանք արդարացի պատասխան …