Այս համոզմունքին է իրավապաշտպանը
Օրեր շարունակ աշխարհի տարբեր երկրներում տեղի ունեցան Հայոց ցեղասպանության 100-րդ տարելիցին նվիրված միջոցառումներ: «Առավոտի» հետ զրույցում իրավապաշտպան Արթուր Սաքունցը իր գնահատականը տվեց այդ ամենին եւ պատասխանելով մեր հարցին, թե ինչ-որ բան փոխեցի՞նք 100-ամյակի միջոցառումների մեր ուղերձով, ասաց. «Անկախ նրանից, Հայոց ցեղասպանության 100-ամյակ էր, 90, թե 75, մեկ է՝ նշվելու էր: Ու աշխարհի տարբեր երկրներում էլ, որտեղ կա հայկական համայնք եւ որտեղ հայկական կազմակերպությունները, որոնք որոշակի ազդեցություն ունեն տվյալ երկրի հասարակական- քաղաքական կյանքում, կարողանում են այս հարցերը բարձրացնել տվյալ երկրի քաղաքական մարմիններում ու ոչ միայն ակցիաներ անել: Այս անգամ, 100-ամյակը տարբերվում էր նրանով, որ այն խորհրդանշական բան ուներ իր մեջ, սովորաբար հասարակական ընկալումների մեջ լրացուցիչ խթան են տալիս պատմական իրադարձությանը՝ առավել ուշադրություն դարձնելու համար: Այն, որ եւս մեկ անգամ արձանագրվեց, որ տեղի է ունեցել ցեղասպանություն, բնաջնջվել է մի ամբողջ ժողովուրդ, դա փաստ է եւ դրան զուգահեռ՝ Քարդաշյանի, Թանկյանի այցը PR-ի էլեմենտներ հաղորդեցին՝ իրազեկման տեսակետից: Ինչ վերաբերում է զուտ քաղաքական տեսակետին, ապա, ասացեք, թե ինչ է արվել մինչ ապրիլի 24-ը, որը պետք է շարունակություն ստանար: Ինձ որեւէ գործողություն կամ ծրագիր այս առումով հայտնի չէ:
Այսինքն՝ դիվանագիտական, եվրոպական տարբեր կառույցներում ինչ-որ էֆեկտիվ աշխատանք չի արվել ու այս առումով Հայոց ցեղասպանության այս տարին նախորդներից ոչնչով չի տարբերվում»:
Դիտարկմանն էլ, թե ապրիլի 24-ն անցավ, բայց մենք մնացինք մեզանով, մեր ցավերով, խնդիրներով, Արթուր Սաքունցը նշեց. «Այն, ինչ եղավ՝ իրապես շոու էր, եւ այս ամբողջ մոտեցումը, անմոռուկներով հանդերձ, դա ընդամենը մեկանգամյա ակցիայի տրամաբանության մեջ էր տեղավորվում, ռազմավարական եւ երկարաժամկետ գործողության տեսակետից՝ ոչինչ չկա: Հստակ է նաեւ այն, որ ցեղասպանության հետ կապված որոշների վերաբերմունքը՝ Հռոմի պապի, կամ Գերմանիայի հայտարարություններն ավելի շատ պետք է դիտարկել Եվրոպա-Թուրքիա կոնտեքստում:
Կարդացեք նաև
Հայոց ցեղասպանության 100-ամյա այս տարելիցն առիթ էր եւս մեկ անգամ արձանագրելու Թուրքիայի՝ մարդու իրավունքների հետ կապված, ժողովրդավարության, թուրքական քաղաքականության հետ կապված հարցերը: Եվ դա իսկապես այդպես է, որովհետեւ Հայոց ցեղասպանությունը դա Թուրքիայի ժողովրդավարացման եւ իրավական, որպես պետություն դառնալու հետ կապված ուղղակիորեն առնչվող հարցեր են եւ այստեղ ՀՀ դիվանագիտական կորպուսի եւ արտաքին քաղաքականության կողմից արված որեւէ գործ չեմ տեսնում: Այլ բան է, որ կա որոշակի տեղեկատվական դաշտ, որ կարող էին օգտագործել, բայց արդյո՞ք կարող էին օգտագործել: Ես կասեմ՝ ոչ, որովհետեւ այդ օգտագործողները գտնվում են Կրեմլում, եւ Բաղրամյան 26-ում, ԱԳՆ-ի շենքում իրավազուրկ են օգտագործելու Հայոց ցեղասպանության հետ կապված այդ ռեսուրսները: Այսինքն՝ ամեն ինչ որոշվում է Կրեմլում, սեփական նախաձեռնությամբ քայլեր կատարելուց զրկված ենք: Իսկ այն, ինչ եղավ՝ դա ընդամենը մեկօրյա ակցիա էր»:
ԵՎԱ ՀԱԿՈԲՅԱՆ
«Առավոտ» օրաթերթ
28.03.2015
