«Հիմնադիր խորհրդարանը» մարտավարական քայլերի ճշգրտման փուլում է: Այս մասին այսօր «Հիմնադիր խորհրդարանի» գրասենյակում լրագրողներին ասաց Ալեք Ենիգոմշյանը: Նրա խոսքով՝ ապրիլի 24-ին իրենց նախատեսած մոբիլիզացիան տեղի չունեցավ օբյեկտիվ եւ սուբյեկտիվ պատճառներով: Ըստ նրա՝ պատճառներից էր իր ընկերների ձերբակալություններն ու ազատազրկումը եւ իշխանության կողմից ստեղծած սարսափի ու ահաբեկման մթնոլորտը: «Մենք էլ թերեւս մեր թերություններն ենք գրանցել, մեզ չհաջողվեց կանխել այդ վախի մթնոլորտը: Թերեւս մեր թերացումն է նաեւ, որ մենք քաղաքացիների հետ շփումները չխորացրինք եւ շարժման կարեւորությունը ավելի խորքային չներկայացրինք… Գրանցել ենք մարտավարական նահանջ»,- ասաց Ալեք Ենիգոմշյանը:
Նա դժգոհեց, որ մինչև մայիսի 10-ը իրենց հանրահավաքները Կենտրոնում արգելել են, ապա ասաց, որ ռեժիմի հեռացման ու ի պաշտպանություն իրենց ազատազրկված ընկերների ակցիաներ են նախատեսել, ու եթե նույնիսկ իրենց շարունակեն արգելել, իրենք օրենքի սահմաններում համապատասխան քայլեր կձեռնարկեն:
Արփինե ՍԻՄՈՆՅԱՆ
