Երեկ, Գյումրիում դաժանորեն սպանված Ավետիսյանների ընտանիքի փաստաբանները լրագրողների հետ հանդիպման ժամանակ հրապարակել են փորձաքննության արդյունքները: Այսօր, ԱԺ պետաիրավական հարցերի մշտական հանձնաժողովի նիստի մեկնարկին, ԱԺ «Ժառանգություն» խմբակցության պատգամավոր Զարուհի Փոստանջյանն առաջարկեց նիստի օրակարգում հարց ընդգրկել եւ քննարկել հանրային հետաքրքրություն ներկայացնող այս հարցում խորհրդարանի եւ խորհրդարանականների հետագա անելիքները: Մասնավորաբար, թե դատաքննության ապագան ինչպիսի՞ն պետք է լինի, այդ արդյունքները ՌԴ դատարանի համար հիմք պե՞տք է հանդիսանան, թե`ոչ: Պատգամավորի կարծիքով, քննության ընթացքն ամբողջությամբ հայկական կողմի վերահսկողության տակ չէ, ինչպես պահանջում է հանրությունը:
Հանձնաժողովի ՀՀԿ-ական նախագահ Հովհաննես Սահակյանն առաջարկեց, որ հանձնաժողովն աշխատանքային քննարկում անցկացնի այս հարցով, որպեսզի «ձեւական բան չստացվի», այլ իրականում կարողանան քննարկել բոլոր տարբերակները եւ լուծումներ առաջարկել:
Հովհաննես Սահակյանի հետ համակարծիք էր ՀԱԿ խմբակցության պատգամավոր Գագիկ Ջհանգիրյանը: Նրա առաջարկով այսօր, հանձնաժողովի նիստից հետո, փակ քննարկում կանցկացնեն:
Նելլի ԳՐԻԳՈՐՅԱՆ
Քննարկումը՝ վաղուց էր պետք անել….