Սա այն դեպքն է, երբ չենք կարող ասել, որ այս ապուրը օգտակար է կամ առողջ սնունդ է: Ոչ, սակայն, նաեւ չենք կարող չխոստովանել, որ այն յուրահատուկ է, համեղ, հագեցնող, արագ պատրաստվող եւ որոշակի դեպքերում ուղղակի փրկություն է: Օրինակ, տոներից հետո, երբ ահագին մսամթերք է մնացել, եւ պետք է շտապ օգտագործել, որ չփչանա: Կամ երբ շատ արագ պատրաստվող ապուր է պետք, եւ ժամանակ չկա միս կամ հավ եփելու:
Անհրաժեշտ մթերքները
Բուսական յուղ- 2 ճաշի գդալ
Սոխ-1 գլուխ
Կարդացեք նաև
Ալյուր-2 ճաշի գդալ
Լոլիկի մածուկ-3 ճաշի գդալ
Երշիկեղեն (ինչ պատահի՝ խոզաճարպ, բաստուրմա, նրբերշիկ, ապխտած կամ եփած երշիկեղեն եւ այլն, որոշ դեպքերում նաեւ աղ դրած ձուկ են ավելացնում, սակայն ես ձեռնպահ կմնամ ձեզ նման բան առաջարկելուց)-200-250 գրամի չափ
Թթու կամ մարինացված վարունգ- 10-15 հատիկ
Պահածոյացված կապար (каперсы)-5-10 հատիկ
Ձիթապտուղ (կարող եք օգտագործել ե՛ւ կանաչ, ե՛ւ սեւ ձիթապտուղ)-10-12 հատիկ
Դափնու տերեւ-2 հատ
Մատուցման համար՝ լիմոնի շերտեր, թթվասեր, կտրատած մաղադանոս
Պատրաստման եղանակը
Կաթսայի մեջ բուսական յուղով տապակել մանր կտրատած սոխը: Եթե ունեք նաեւ խոզաճարպ (сало), կարող եք դա էլ սոխի հետ միաժամանակ լցնել կաթսայի մեջ:
Երբ սոխը լավ տապակված լինի, ավելացրեք ալյուրը, լավ խառնեք, որպեսզի գնդեր չառաջանան, ավելացրեք լոլիկի մածունը, շարունակեք խառնել:
Հավելեք կտրատած երշիկեղենը, թողեք երկու-երեք րոպե տապակվի, ապա ավելացրեք եռացրած ջուր կամ եթե ունեք՝ տավարի արգանակ: Երբ կսկսի եռալ, ավելացրեք նաեւ կտրատած մարինացված վարունգը, ձիթապտուղը, կապարը, դափնու տերեւը: Թողեք եւս երկու-երեք րոպե եւ անջատեք: Քանի որ բոլոր բաղադրիչները, ըստ էության, ջերմամշակման կարիք չունեն, երկար եփելու կարիք չկա:
Ապուրը մատուցեք կիտրոնի շերտերով եւ թթվասերով: Վրան լցրեք նաեւ թարմ կտրատած մաղադանոս:
Այս ապուրը շատ լավ ջերմացնում է ցուրտ երեկոներին, հատկապես՝ մի գավաթ օղիով: Զուր չէ, որ հատկապես տղամարդիկ են շատ սիրում այս ճաշատեսակը:
Բարի ախորժակ:
