ԱԺ-ում քննարկվում է ՀՅԴ պատգամավորների եւ Թեւան Պողոսյանի հեղինակած «Հանրաքվեի մասին օրենքում» փոփոխություններ եւ լրացումներ կատարելու մասին նախագիծը:
ՀԱԿ խմբակցության ղեկավար Լեւոն Զուրաբյանը Արծվիկ Մինասյանին հարցրել էր, թե հանրաքվեի դեպքում ինչպե՞ս պետք է «այո»-ի եւ «ոչ»-ի կողմնակիցների համար հավասար պայմաններ ստեղծվեն. «Հանրային հեռուստատեսությամբ ինչպե՞ս պետք է անենք, որ լինեն հավասար պայմաններ: Օրինակ, Ընտրական օրենսգրքում այդ հարցը կարգավորվում է, բոլոր թեկնածուների համար հավասար պայմաններ պետք է ստեղծել: Հանրաքվեի դեպքում թեկնածուները «այո»-ն եւ «ոչ»-ն են: Ինչպե՞ս պետք է ստեղծել հավասար պայմաններ»:
Իր ելույթում Լեւոն Զուրաբյանն առաջարկեց իր լուծումները. «Առաջարկում ենք, որ հանրաքվեի քարոզչության ժամանակաշրջանից առաջ ՀՀ բոլոր քաղաքական ուժերը Հ/Կ-ները, որոնք որոշել են մասնակցել հանրաքվեին, գրանցվեն որպես այո-ի կամ ոչ-ի կողմնակից՝ ԿԸՀ-ում: Դրանից հետո այո-ի եւ ոչ-ի կողմնակիցներին պետք է տրամադրվի հավասարաչափ ժամանակ հեռուստատեսությամբ կամ Հանրային ռադիոյով իրենց տեսակետը արտահայտելու համար»:
Լեւոն Զուրաբյանը կանխատեսում է, որ այդ դեպքում շատերը կուզենան անվճար եթերաժամից օգտվել եւ հարց է առաջանում՝ ինչպե՞ս պետք է ժամանակը բաշխեն այո-ի եւ ոչ-ի կողմնակիցների միջեւ: Ըստ Լեւոն Զուրաբյանի, ելույթ ունենալ կցանկանան ուժեր, որոնք մարգինալ են, անէական են գործընթացի համար, չեն կարող հավասար ոտք մեկնել հասարակության համար ազդեցիկ գործիչների հետ. «Դրա համար այո-ի եւ ոչ-ի դեպքում պետք է 75 տոկոսը ժամանակի տրամադրել այն խմբակցություններին, որոնք ներկայացված են խորհրդարանում: Մնացած 25 տոկոսը կարելի է բաժանել արտախորհրդարանական քաղաքական ուժերի, քաղաքացիական նախաձեռնությունների միջեւ: Դրանով հարցը լուծված կլինի եւ հավասար հնարավորություն կապահովի բոլորի համար»:
Կարդացեք նաև
Լեւոն Զուրաբյանն ասաց, որ իրենց առաջարկներն ընդունելու դեպքում միայն կարող են հավատալ ՀՀԿ պատգամավոր Հովհաննես Սահակյանի խոսքերին, որ պատրաստ են համագործակցել:
Հռիփսիմե ՋԵԲԵՋՅԱՆ
