Հայկ Ալումյանի խոսքերով՝ դա նաեւ հանգեցնում է գործի քննության օբյեկտիվ եւ բազմակողմանի քննության պահանջի խախտմանը
«Եթե խոսում ենք խոշտանգումների վերաբերյալ հաղորդումների մասին, ապա պետք է կատարվի անհապաղ քննություն»,- մայիսի 21-ին Բաց հասարակության հիմնադրամների կազմակերպած հանրային քննարկման ընթացքում հայտարարեց փաստաբան Հայկ Ալումյանը:
Հանրային քննարկման թեման էր «Խոշտանգումների արդյունավետ քննությունը Հայաստանում. Արդիական խնդիրները եւ միջազգային փորձը»:
Հայկ Ալումյանը նկատեց, թե չնայած այն հանգամանքին, որ քրեական դատավարության օրենսգիրքը նախատեսում է տասնօրյա ժամկետում որոշել գործ հարուցելու կամ հարուցումը մերժելու հայցը, բայց Հայաստանում այն ոչ միշտ է անհապաղ կատարվում. «Գործնականում մենք այստեղ ունենք խնդիրներ: Քննությունն ընդհանրապես եւ խոշտանգումների քննությունը մասնավորապես անհապաղ չի սկսվում, եւ մեր գնահատմամբ՝ այս չափանիշին չի համապատասխանում»:
Կարդացեք նաև
Եվրոպական դատարանի սահմանած չափորոշիչը, թե քննության իրականացման համար պատասխանատու կամ հետաքննությունը իրականացնող անձը պետք է անկախ լինի մեղադրվող պաշտոնատար անձից կամ մարմնից, Հայկ Ալումյանը կարծում է, որ պահպանվում է. «Մեր խմբի մեջ տարբեր կարծիքներ կան, բայց անձամբ իմ գնահատմամբ, այո՛, այսօր Հատուկ քննչական ծառայությունը կարող է համարվել անկախ մարմին»:
Փաստաբանի խոսքերով՝ օբյեկտիվ եւ բազմակողմանի քննության պահանջը շատ գործերով չի իրականացվում եւ խախտվում է. «Իմ կարծիքով՝ մենք լուրջ խնդիրներ ունենք զոհերի՝ խոշտանգումներից տուժած անձանց արդյունավետ մասնակցության հետ կապված: Ամբողջ նախաքննության ընթացքում, ըստ մեր քրեական օրենսգրքի, տուժողները զրկված են գործի նյութերի մասին սպառիչ տեղեկություն ունենալու հնարավորությունից: Ինչպես գիտենք, նախաքննության ընթացքում տուժողներն ընդամենը մի քանի դատավարական փաստաթղթերի ծանոթանալու հնարավորություն ունեն՝ առաջադրված մեղադրանքին, փորձաքննություններ նշանակելու մասին որոշումներին, փորձագետների եզրակացություններին: Սա հնարավորություն չի տալիս, որպեսզի խոշտանգման զոհերն արդյունավետորեն մասնակցեն քրեական դատավարությանը, սա նաեւ հանգեցնում է գործի քննության օբյեկտիվ եւ բազմակողմանի քննության պահանջի խախտմանը»:
Ամի ՉԻՉԱԿՅԱՆ
