Ճանապարհային ոստիկանության հատուկ պահպանման տարածքի մոտ մայիսի 23-ին մի խումբ տաքսու վարորդներ բողոքի ակցիա էին կազմակերպել: Ճանապարհային ոստիկանության ներկայացուցիչների հետ խոսելուց հետո նրանք այնտեղից շարժվեցին Մաշտոցի պողոտա, Օպերայի եւ բալետի թատրոնի հարակից տարածքը, որտեղ ավտոմեքենան կայանելու համար բազմիցս տուգանվել է տաքսու վարորդ Էմիլ Սահակյանը:
Ոստիկանները նախ տաքսու վարորդներին զգուշացրեցին, որ այդտեղ կայանելն արգելվում է եւ պահանջեցին դուրս հանել մեքենաները, սակայն բանակցություններից հետո վարորդներին տաս րոպե ժամանակ տվեցին:
«Անհատ տաքսիների վարորդների իրավունքների պաշտպանության կենտրոն» հասարակական կազմակերպության անդամ Մխիթար Օհանյանը նշեց, որ պողոտայում տարածքը բավարար է, որպեսզի կայանատեղիներ ստեղծվեն եւ այդ դեպքում այլ վարորդներ չեն կարողանա ճանապարհային երթեւեկության կանոնները խախտել:
Մանրամասները՝ շուտով տեսանյութում:
Կարդացեք նաև
Շուտով ներկաներին միացավ Ճանապարհային ոստիկանության պետի տեղակալ, ոստիկանության փոխգնդապետ Արմեն Խաչատրյանը: Նա ներկաներին տեղեկացրեց, որ քաղաքաշինական նորմերով այդտեղ կանգառն արգելված է. «Եթե մի բանը որոշված է, ոստիկանությունը պետք է այդ որոշումը ի կատար ածի: Բայց դրա փոխարեն՝ մենք քննարկեցինք, ձեզ ասացինք, որ Թումանյան փողոցում որոշել ենք տաքսիների համար տեղեր հատկացնել, այսինքն՝ լինեն կանգառի տեղեր, որոնք հատկացված լինեն միայն տաքսու վարորդներին, այսինքն՝ եթե այլ տրանսպորտային միջոց կանգառ կատարի այդ տեղերում, նա կենթարկվի վարչական պատասխանատվության»:
Տաքսու վարորդ Էմիլ Սահակյանը համաձայն չէր այդ մտքի հետ. «Հիմա կարող ենք գնալ նկարել, թե որտեղ է խոչընդոտ հանդիսանում՝ մեր պահանջած տեղի վրա՞, թե՞ Թումանյան փողոցի վրա: Թումանյան փողոցի վրա որտե՞ղ եք ուզում տեղ հատկացնել»:
Մանրամասները՝ շուտով տեսանյութում:
Արմեն Խաչատրյանը առաջարկեց դիմում ներկայացնել ճանապարհային ոստիկանությանը, որպեսզի հարցը մեկ անգամ եւս քննարկվի: Վարորդները համաձայնեցին, սակայն շարունակեցին պնդել որ մինչեւ քննարկումը իրենք պետք է Մաշտոցի պողոտայի այդ հատվածում իրենց մեքենաները կայանեն:
Ամի ՉԻՉԱԿՅԱՆ
