Այսօր լրագրողների հետ զրույցում «Ժառանգության» պատգամավոր Զարուհի Փոստանջյանը հարցին՝ Սյունիքի մարզպետ Սուրիկ Խաչատրյանի մեքենայի ուղղությամբ կրակոցները մահափո՞րձ էր, թե՞ բեմադրություն՝ Ձեր կարծիքով, պատասխանեց կարճ. «Բեմադրություն»:
Ըստ նրա, նման դեպք չէր կարող լինել Սյունիքի մարզում: Հարցին՝ որովհետեւ նա Սուրիկ Խաչատրյանն է, դրա՞ համար՝ Զարուհի Փոստանջյանը պատասխանեց. «Ինքը վերահսկում է Սյունիքում ամբողջ իրավիճակը, հետեւաբար իր վրա որեւէ մեկը չէր համարձակվի գալ այդպես կրակել: Եթե իրոք մտադրություն լիներ նրա վրա կրակելու եւ նրան սպանելու, ապա հենց կսպանեին նրան, ոչ թե ուղղակի կկրակեին»:
Թե ի՞նչ խնդիր էր լուծում այդպիսի բեմադրություն կազմակերպելը՝ Զարուհի Փոստանջյանն ասաց. «Իբրեւ թե զոհ են: Իրեն կարգեն որպես զոհ, բայց հասարակությունն ադեկվատ է իրավիճակին եւ չի վստահի, կհասկանա, որ դա բեմադրություն է»:
Հարցին՝ նրա խորհրդականներն ու օգնականները հայտարարում են, թե սա կրակոց էր՝ ուղղված պետականության դեմ: Զարուհի Փոստանջյանի խոսքերով՝ Սուրիկ Խաչատրյանը չի ներկայացնում մեր պետությունը:
Կարդացեք նաև
Aravot.am-ի հարցին՝ գլխավոր դատախազ Գեւորգ Կոստանյանը ԱԺ-ում կոշտ հայտարարություն արեց, թե Սուրիկ Խաչատրյան չէ, ցանկացած Սուրիկ Խաչատրյանի կդատեմ, եթե ապացույցներ լինեն, ինչպե՞ս եք գնահատում այս հայտարարությունը, սա է՞լ է շոու, թե՞ իսկապես նա պատրաստ է այդ քայլին գնալ՝ Զարուհի Փոստանջյանը պատասխանեց. «Մանկական խաղ է»:
Հռիփսիմե ՋԵԲԵՋՅԱՆ
