Այսօր ժամը 18.00-ին գյումրեցի ցուցարարների Թատերական հրապարակ ոտք դնելն ու հորդառատ անձրեւ, ուժեղ կարկուտ տեղալը մեկ եղավ: Ցուցարարները, որոնց գերակշիռ մասը քաղաքի մտավորականությունն էր. այսօր հրավիրվել էին Թատերական հրապարակ հանրային քննարկման, երկար ժամանակ ստիպված եղան պատսպարվել թատրոնի մուտքի մոտ, մինչեւ որ գոնե կարկուտը կդադարեր:
Այդ ընթացքում նրանք զրուցում էին՝ կատակելով, թե 5 օր շարունակ տեղացող հորդառատ անձրեւները վարչապետի պատվին են: «Բա ասում էիր հոսանքի թանկացման պատճառներից մեկը սակավաջուր լինելն է, դե հիմա էլ ասա սակավաջուր է, եղանակն էլ մեզ միացել», -կատակում էին նրանք: Երիտասարդները, տեսնելով, որ փոքր ինչ մեղմեց անձրեւը, իջան թատրոնի բակ, սկսելով շուրջպար բռնել, քոչարի պարել:
Նշենք, որ այսօր գյումրեցիներին էին միացել նաեւ Մարտունիի ու Արմավիրի մի քանի բնակիչներ: Նրանցից մեկը մեզ հետ զրույցում ասաց, որ եկել են պայքարելու, որ երկիրը լինի արդար, ժողովրդավար, մատչելի բնակչության համար: Ըստ նրա, իշխանություններն այնպես են անում, որ մարդիկ արտագաղթեն երկրից, սակայն իրենք են երկրի տերը ու չեն արտագաղթելու:
Կարդացեք նաև
Մարտունիից եկած կանանցից մեկն էլ ասաց, որ իր տպավորությամբ իշխանությունների պահվածքը փափուկ է, ինչ-որ զիջումների են գնում, նույնիսկ Պերմյակովի գործը հանձնեցին հայկական կողմին:
Այսօր Գյումրի էր եկել նկարահանող մի խումբ Ուկրաինայից, վերջիններս հարցազրույցներ վերցրեցին մարտունեցիներից:
Թատերական հրապարակ էին եկել նաեւ Վարդան Աճեմյանի անվան դրամատիկական թատրոնի գլխավոր ռեժիսորն ու ճանաչված դերասանները: Նրան անչափ մտահոգ էին էլեկտրաէներգիայի թանկացման հարցով: Թատրոնում էին նաեւ քաղաքի փաստաբանները, իրավապաշտպանները, ազգագրագետները, քահանաները, հոգեբանները, դասախոսները, դպրոցի ուսուցիչները, մայրաքաղաքից Թատերական հրապարակ եկավ նաեւ քաղաքագետ Ստեփան Գրիգորյանը: Նրանցից շատերը ելույթ ունեցան՝ խստորեն քննադատելով կառավարության՝ ժողովրդի դեմ ուղղված որոշումները:
Նունե ԱՐԵՎՇԱՏՅԱՆ
