«Ոչ թալանին» նախաձեռնության առաջարկով Բաղրամյան պողոտայում գտնվող ցուցարարների մի մասը գնաց Ազատության հրապարակ՝ հանրային քննարկման: Սակայն ցուցարարների շարքերից հայտնվեցին երիտասարդներ, որոնք նախաձեռնությունը «վերցրին իրենց ձեռքը»: Նրանք, տիրելով խոսափողին, ժողովրդին կոչ արեցին մնալ Բաղրամյան պողոտայում եւ պայքարը շարունակել այդտեղ: Այդ երիտասարդերի հորդորին հետեւողներ կան, ու նրանք այս պահին պողոտայում են: Մինչ նախաձեռնության անդամները կարդում էին իրենց տեքստը, Բաղրամյան պողոտա եկավ ոստիկանապետ Վլադիմիր Գասպարյանը, որը լրագրողների հարցին՝ ի՞նչ եք պատրաստվում անել մնացածների նկատմամբ, պատասխանեց կարճ՝ մաքրելու ենք ու խստորեն:
Դրանից հետո սաղավարտներով, վահաններով, մահակներով հանդերձավորված ոստիկանները շարք կազմեցին Սահմանադրական դատարանի առջեւ: Նրանց կողքին են նաեւ կարմիր բերետավորները: Փոխոստիկանապետ Վալերի Օսիպյանը Բաղրամյան պողոտայում մնացած մարդկանց բարձրախոսով արդեն երկու անգամ կոչ է արել դադարեցնել «անօրինական հավաքը», չխախտել օրենքի այլ կետեր եւ նույնպես ուղեւորվել Ազատության հրապարակ՝ հակառակ դեպքում ոստիկանությունը օրենքով սահմանված կարգով եւ իր լիազորությունների շրջանակներում համապատասխան գործողություններ, այդ թվում նաեւ, ֆիզիկական կգործադրի:
Այս պահին Բաղրամյան պողոտայում լարված, սպասողական վիճակ է: Ամեն բան տանում է նրան, որ բախում այնուամենայնիվ տեղի կունենա:
Աշոտ ՀԱԿՈԲՅԱՆ
