«Հայջրմուղկոյուղի» -ի ՓԲԸ «Հյուսիսարևմտյան» մասնաճյուղի Արթիկի տեղամասի պետ Կարեն Չախոյանի նկատմամբ հարուցվել է քրեական գործ ՀՀ քրեական օրենսգրքի 200 հոդվածի՝ առևտրային կաշառքի հատկանիշներով: Նշենք, որ Կարեն Չախոյանը Արթիկի նախկին ոստիկանապետի՝ Ռոբերտ Չախոյանի որդին է:
Ինչպես Aravot.am-ին տեղեկացրեց Շիրակի մարզի դատախազ Րաֆֆի Ասլանյանը (լուսանկարում) քրեական գործը հարուցվել է Սպանդարյան գյուղի բնակիչների բողոքով: Բանն այն է, որ այս պաշտոնյան ամբողջ գյուղի վրա տույժ-տուգանքներ է գրել ու ջրաչափական հաշվիչները կապարակնքել՝ չթույլատրելով ջուրն օգտագործել: Արթուր Բաղդասարյանի համագյուղացիներն էլ՝ ի նշան բողոքի, հունիսի 23-ին փակել են ճանապարհը, Արթիկի ոստիկանության միջամտությունից հետո նոր միայն բացել են այն: Այնուհետ գյուղացիները իրենց դիմում-բողոքները ներկայացրել են Շիրակի մարզի դատախազին:
Րաֆֆի Ասլանյանի հանձնարարությամբ Արթիկի քննչական բաժնում նյութեր են նախապատրաստվել, որի ընթացում տարբեր գյուղացիներ բացատրություն են տվել այն մասին, որ կաշառք են տվել Ջրմուղի պետին: Դատախազի հանձնարարությամբ հարուցվել է քրեական գործ: Ջրմուղի պետը դեռ պաշտոնավարում է:
Նշենք, որ նախկինում ևս այս նույն կառույցի պաշտոնյաների կողմից թույլ են տրվել չարաշահումներ, որի արդյունքում քրեական գործեր են հարուցվել ու պաշտոնազրկվել են:
Կարդացեք նաև
Հավելենք, որ Կարեն Չախոյանի նկատմամբ հարուցված քրեական գործում շոշափվում են նաև ջրմուղի այլ աշխատակիցների՝ Արտաշես Վարագյանի ու ջրմուղի պետի տեղակալ Գևորգ Առաքելյանի անունները: Նրանք երկուսն էլ Արթիկի ավագանու անդամներ են:
Նունե ԱՐԵՎՇԱՏՅԱՆ
