Երեկ Գյումրու բժշկական կենտրոն են տեղափոխել ռուս զինծառայող, Մուշ թաղամասի 43 շենքի բնակիչ, 1994 թվականին ծնված Յուրի Վիտալեւիչին՝ աջ ձեռքի բազկի վնասված վերքերով: Վերջինիս համապատասխան բժշկական օգնություն են ցուցաբերել, ձեռքին կարեր են դրել, որից հետո զինծառայողն աննկատ լքել է հիվանդանոցը: Թե ինչո՞ւ են նրա ձեռքերը վնասվել, պարզվում է նա հարբած վիճակում կոտրել է Գյումրիի Խրիմյան Հայրիկ փողոցի վրա գտնվող մրգերի խանութի ապակին, որը տեսանկարահանվել է խանութում տեղադրված տեսախցիկի միջոցով: Խանութի կողքին գտնվող մարդիկ, տեսնելով նրա վնասված ձեռքերը, զանգահարել են շտապօգնություն ու տեղափոխել հիվանդանոց:
Հիվանդանոցից այս մասին տեղյակ է պահվել ոստիկանությանը: Մեր այս լուրը հաստատեցին ոստիկանությունում:
Հիշեցնենք, որ երեկ մեկ այլ ռուս զինծառայող՝ 27-ամյա Գալենտև Ալեքսանդր Սերգևիչը, հարբած վիճակում իր «Մերսեդես» մակնիշի մեքենայով պտույտի էր դուրս եկել Գյումրու Շիրակացի փողոցում՝ սկզբում վթարի ենթարկելով ու ջարդուփշուր անելով «Վազ 31» մակնիշի մեքենան, այնուհետ առաջ անցնելով՝ ջարդուփշուր էր արել եւս երկու մեքենաներ:
Գյումրու Շիրակացի փողոցից դեպի Անի թաղամաս տանող հատվածը երեկ ժամեր շարունակ կաթվածահար էր եղել, փակ էր: Բարեբախտաբար մարդկային զոհեր չէին եղել:
Կարդացեք նաև
Գյումրեցիների բախտը բերել էր նաեւ այն իմաստով, որ ռուս հարբած զինծառայողը պտույտի էր դուրս եկել երեկոյան, այսինքն` այն ժամին, երբ փողոցում անցորդներ քիչ են լինում:
Նունե ԱՐԵՎՇԱՏՅԱՆ
