Օրերս Երեւանի «Լոֆթ» կենտրոնում տեղի ունեցավ «Ապագայի Հայաստան» ինտելեկտուալ սեղանի խաղի շնորհանդեսը: Նախագծի հեղինակներն են երեւանցի երիտասարդներ Արամ Մամիկոնյանը եւ Դավիթ Ալեքսանյանը: Խաղը ավելի դյուրին է դարձնում «Հայ գրականություն» եւ «Հայոց պատմություն» առարկաների ուսուցումը:
Դավիթ Ալեքսանյանին խնդրեցինք տալ խաղի հետ կապված մեզ հետաքրքրող հարցերի պատասխանները:
– Դավիթ, ե՞րբ ծնվեց խաղի ստեղծման գաղափարը, որո՞նք են շարժառիթները:
– Խաղի ստեղծման գլխավոր գործոններն են՝ ունենալ սեփական բիզնես-նախագիծ եւ օգնել մեր հայրենակիցներին՝ թեկուզեւ կրթական տեսանկյունից: Բացի այդ, Հայոց ցեղասպանության 100-ամյա տարելիցի հետ կապված ցանկանում էինք ազգանվեր որեւէ գործ ձեռնարկել:
– Խոսենք նպատակների մասին:
– Նախ սկսենք նրանից, որ այս խաղը նախատեսված է տասը տարեկանից բարձր երեխաների, ինչպես նաեւ այն մեծահասակների համար, ովքեր ուզում են ստուգել իրենց իմացության մակարդակը: Մեր նախագծի հիմնական նպատակներն են տրամաբանական, ուսանելի, ինչպես նաեւ պատմական հարցերի միջոցով յուրաքանչյուր խաղացողի մեջ զարգացնել մի շարք որակական հատկանիշներ, ինչպիսիք են տրամաբանությունը, հայրենասիրությունը եւայլն: Ուզում ենք խաղը հասանելի դարձնել Սփյուռքում ապրող մեր հայրենակիցների համար, քանի որ այն կարող է նպաստել հայապահպանության գործին: Ցանկանում ենք նաեւ հասարակությանն ավելի իրազեկ դարձնել Հայոց ցեղասպանության մանրամասներին: Նախատեսել ենք խաղի վաճառքից գոյացած հասույթի մի մասն էլ փոխանցել կարիքավոր ընտանիքներին, որպեսզի ինչ-որ չափով թեթեւացնենք նրանց հոգսերը:
– Մեր հայրենակիցները ինչպե՞ս կարող են ձեռք բերել խաղը, եւ արդյոք այն մատչելի՞ է բոլորի համար:
– Խաղը կարելի է պատվիրել https://futurearmenia.com/ կայքում: Հաշվի առնելով հասարակության սոցիալական վիճակը՝ փորձել ենք հնարավորինս ցածր գին սահմանել (3500 դրամ): Մենք առաջնորդվում ենք «Գաղափարի հաղթանակն ավելի բարձր է, քան հասույթը» կարգախոսով:
– Կուզենայինք իմանալ, թե ինչ թեմաների շրջանակներում են պատրաստված հարցերը եւ համառոտ տեղեկանալ խաղի կանոններին:
– Խաղին կարող է մասնակցել 2-4 հոգի: Կարելի է խաղալ նաեւ թիմերով: Ցանկալի է, որ լինի խաղավար: Մասնակիցները նետելով զառը` առաջ են շարժվում եւ, հայտնվելով որեւէ դաշտի վրա, ընտրում են համապատասխան թեմային առնչվող հարցերի խմբից որեւէ հարց: Ընտրված հարցերը դուրս են գալիս ընդհանուր խմբից: Ճիշտ պատասխանը կարելի է ստուգել «Կանոններ եւ պատասխաններ» խաղի գրքույկից: Խաղի թեմաներն են՝ Պատմական Հայաստան, Հայոց ցեղասպանություն, Հայ գրականություն, Մեծանուն հայեր, ինչպես նաեւ Օսմանյան բանտ, որն իր մեջ ներառում է տրամաբանական հարցեր: Հասնելով «Ընտրության» դաշտ՝ մասնակիցը հնարավորություն է ստանում ընտրելու Հայ գրականություն կամ Մեծանուն հայեր թեմաներից որեւէ մեկը եւ շարժվել համապատասխան ուղղությամբ: Խաղն ավարտվում է «Ամփոփում» դաշտում, հաղթող է ճանաչվում առավելագույն միավորներ վաստակած մասնակիցը: Խաղի կանոններին ավելի մանրամասն կարելի է ծանոթանալ մեր կայքում:
– Ի՞նչը Ձեզ կօգնի հասկանալ, որ նախագիծը ծառայել է իր նպատակին:
– Մենք մեզ լիարժեք բավարարված կզգանք, եթե խաղն իր ձեռքը վերցրած յուրաքանչյուր անձ քաղի գիտելիքների այն պաշարը, որը ներառված է այստեղ:
Զրուցեց ՀԱԿՈԲ ՉՈՔԵՔՉՅԱՆԸ
«Առավոտ» օրաթերթ
31.07.2015
