«Մենք ճանապարհներ փակող չենք, գլուխ ջարդող չենք, մեզ համար գլուխներս կախ աշխատել ենք, հիմի էլ մեր հալալ քրտինքով վաստակած գումարներն ենք պահանջում»,- «Առավոտի» հետ զրույցում ասաց Գյումրիում «Գլենդել Հիլզ» ընկերության նախկին աշխատակիցներից մեկը՝ Ֆրունզիկ Մկոյանը: Նա անցյալ տարվա օգոստոսից այլեւս ընկերության աշխատակիցը չէ: Ընկերությունը Ֆրունզիկ Մկոյանին պարտք է երեք ամսվա աշխատավարձի գումար:
Ըստ Ֆրունզիկ Մկոյանի՝ երբ մարդիկ որեւէ դժգոհություն են ունենում ու փողոցները փակելու միջոցով են փորձում հարցը լուծել, վարչապետը հորդորում է օրենքի շրջանակներում խնդրին լուծում ակնկալել. «Բայց օրենքով էլ բողոքում ենք, մեր խնդիրը չի լուծվում»,- ասում է նա:
Երեկ Շիրակի մարզի «Գլենդել Հիլզ» ընկերության Ախուրյան շինարարության ութ աշխատակիցներ գրավոր դիմել են «Առավոտ» օրաթերթին՝ նշելով, որ ընկերությունն իրենց աշխատավարձերի պարտքեր ունի: Ինչպես նամակում է նշված, կան մարդիկ, որոնք մեկ տարուց ավելի գումար չեն ստացել, կան աշխատակիցներ էլ, որոնց ընկերությունը պարտք է մեկ-երկու ամսվա աշխատավարձ: Նրանք դիմել են ՀՀ վարչապետ Հովիկ Աբրահամյանին, ՀՀ նախագահին, քաղաքաշինության նախարարին: Վարչապետը գյումրեցիների դիմումը մակագրել է ընկերությանը, հանրապետության նախագահի գրասենյակից դեռ պատասխան չեն ստացել, քաղաքաշինության նախարարությունից էլ հայտնել են, որ հարցի կարգավորումը դուրս է նախարարության իրավասությունների շրջանակներից, եւ որ նրանց դիմումը վերահասցեագրվել է «Գլենդել Հիլզ» ընկերություն՝ սեղմ ժամկետներում հարցը կարգավորելու եւ միջոցառումներ ձեռնարկելու նպատակով:
Ընկերության նախկին 8 աշխատակիցների բողոքի առնչությամբ «Գլենդել Հիլզ» ՓԲԸ հանրության հետ կապերի եւ տեղեկատվության վարչությունից «Առավոտին» պարզաբանեցին, որ Գյումրիում «Գլենդել Հիլզ» ընկերության բոլոր աշխատակիցների աշխատավարձերը վճարվել են: Ըստ նույն աղբյուրի. «Չի կատարվել բացառապես վերոհիշյալ 8 աշխատակցի աշխատավարձի վերջնահաշվարկը, որոնք բոլորն էլ նյութական արժեքների պատասխանատուներ են: Ներկայում ընկերությունն իրականացնում է իրեն պատկանող նյութական արժեքների գույքագրում եւ հավաքագրում շինհրապարակներից: Ուստի վերջնահաշվարկը կկատարվի այս գործընթացի ավարտից հետո միայն»:
Կարդացեք նաև
ԼՈՒՍԻՆԵ ԲՈՒԴԱՂՅԱՆ
«Առավոտ» օրաթերթ
06.08.2015
