«Ժառանգություն» կուսակցության փոխնախագահ Արմեն Մարտիրոսյանը մեզ հետ զրույցում ասել էր, որ Սահմանադրության նախագծի 201, 202, 203 հոդվածներում հակասություն կա. «201-ով ասում է, որ 1-3-րդ գլուխներում եւ մի քանի այլ գլուխներում ու հոդվածներում կարող են փոփոխություններ արվել միայն հանրաքվեով: 202-րդ հոդվածն ասում է, որ Սահմանադրության 1-3-րդ հոդվածները, որոնք մտնում են հենց 1-ին գլխի մեջ, փոփոխման ենթակա չեն: Այսինքն, մի տեղ ասվում է՝ հանրաքվեով կարելի է փոխել, մյուս տեղում ասվում ՝ հանրաքվեով էլ չի կարելի փոխել: Այս երկուսի մեջ արդեն հակասություն առաջացավ»:
Այսօր այս առնչությամբ մեր հարցին ի պատասխան՝ «Պոստ Սկրիպտում» ակումբում սահմանադրագետ Գաբրիել Բալայանն ասաց, որ այդտեղ հակասություն չի տեսնում: Բայց, ըստ նրա, հակասություն կա մեկ այլ հոդվածում. «Ասվում է, որ բոլորը հավաար են օրենքի առջեւ: Մեկ էլ մի տեղ տեսնում ես՝ նախագահը կարող է պաշտոնանկ արվել կամ ենթարկվել պատասխանատվության, եթե կատարել է ծանր հանցագործություն: Այսինքն, միջին ծանրության հանցագործություն եթե կատարել է՝ չես կարող պատասխանատվության ենթարկել: Եթե խուլիգան է, չես կարող մարդուն մեղադրանք առաջադրել»:
Փաստաբան Տիգրան Աթանեսյանն էլ հավելեց. «Այսինքն, եթե գրպանահատ ես, չես կարող ենթարկվել պատասխանատվության»:
Գաբրիել Բալայանը նշեց, որ վտանգ են պարունակում միջազգային կառույցներին անդամագրվելու հետ կապված դրույթները:
Կարդացեք նաև
Հռիփսիմե ՋԵԲԵՋՅԱՆ
