ՀՀ տրանսպորտի և կապի նախարար Գագիկ Բեգլարյանը սեպտեմբերի 10-ին ընդունեց հայկական երկաթուղու հավատարմագրային կառավարումն ստանձնած «Ռուսական երկաթուղիներ» ԲԲԸ-ի նորանշանակ նախագահ Օլեգ Բելոզյորովին և նրա գլխավորած պատվիրակությանը։
Պատվիրակության կազմում էին «Հարավկովկասյան երկաթուղի» ՓԲԸ-ի նորանշանակ գլխավոր տնօրեն Սերգեյ Վալկոն, ընկերության նախկին գլխավոր տնօրեն Վիկտոր Ռեբեցը, «Ռուսական երկաթուղիներ» և «Հարավկովկասյան երկաթուղի» ընկերությունների ներկայացուցիչներ:
Գագիկ Բեգլարյանը շնորհավորեց Օլեգ Բելոզյորովին «Ռուսական երկաթուղիներ» ԲԲԸ-ի նախագահի պաշտոնում նշանակվելու առթիվ և հույս հայտնեց, որ նորանշանակ նախագահի գործունեությամբ կշարունակվի հայ-ռուսական գործընկերային փոխշահավետ համագործակցությունը՝ ի նպաստ Հայաստանի Հանրապետության տրանսպորտային համակարգի:
«Շնորհավորում եմ Ձեզ «Ռուսական երկաթուղիներ» ԲԲԸ-ի նախագահի պաշտոնում նշանակվելու առթիվ և ցանկանում բեղմնավոր աշխատանք: Հուսով եմ, որ համատեղ աշխատանքի շնորհիվ կգրանցենք նոր հաջողություններ։ Մենք պատրաստ ենք աջակցել Ձեզ և նպաստել երկաթուղային տրանսպորտի ոլորտի ծրագրերի իրականացմանը»,- իր խոսքում նշեց նախարարը:
Կարդացեք նաև
«Ռուսական երկաթուղիներ» ԲԲԸ-ի նորանշանակ նախագահը շնորհակալություն հայտնեց ջերմ ընդունելության համար: Նա ևս կարևորեց Հայաստանի և Ռուսաստանի միջև եղած բարեկամական և գործընկերային կապերը՝ նկատելով, որ Հայաստանում երկաթուղային տրանսպորտի ոլորտն արդեն ունի մի շարք դրական տեղաշարժեր, ինչն ուրախացնող և ոգևորող է:
«Ցանկանում եմ կարևորել այն արդյունքները, որոնք մինչև այս պահը գրանցվել են Հայաստանի երկաթուղային ցանցի շահագործման ոլորտում: Քարշակների, շոգեքարշերի նորոգման համար Հայաստանում արդեն կան անհրաժեշտ պայմաններ: Ես տեսնում եմ բոլոր այն նախապայմանները, որոնք անհրաժեշտ են լավ հեռանկար ունենալու համար: Իհարկե, կան նաև խնդիրներ, որոնց մենք անպայման կանդրադառնանք և համատեղ աշխատանքի շնորհիվ կկարողանանք հաղթահարել դրանք: Ես վստահ եմ, որ առաջիկայում մեզ սպասվում է համատեղ արդյունավետ աշխատանք»,- ասաց Օլեգ Բելոզյորովը:
Հանդիպման ընթացքում կողմերը կարծիքներ փոխանակեցին առաջիկա ծրագրերի, երկաթուղային տրանսպորտի ոլորտում նախատեսվող ներդրումների և մի շարք այլ հարցերի վերաբերյալ:
ՀՀ տրանսպորտի և կապի նախարարության լրատվական ծառայություն
