«Մշակույթի նախարարության ենթակայության տակ գործող մի քանի պետական ոչ առեւտրային կազմակերպություններ Ռուսաստանից ստացել են դրամաշնորհներ: Դա, եթե չեմ սխալվում, Ստանիսլավսկու թատրոնն է, ինչ-որ հիմնադրամ, «Հայֆիլմ»-ը»,- այս մասին «Արտաքին քաղաքականություն եւ լուսաբանում» թեմայով սեմինարի ընթացքում ասաց «Իրազեկ քաղաքացիների միավորում» ՀԿ-ի ծրագրերի համակարգող Դանիել Իոաննիսյանը:
Նա նշեց, որ Ռուսաստանի կողմից Հայաստանի մշակույթի համար տրամադրված դրամաշնորհները մի քիչ են ավելի, քան Վրաստանի տվածը եւ մի քանի անգամ ավելի քիչ են, քան Ուկրաինայից ստացվածները. «Սա մշակույթի նախարարության պաշտոնական թվերն են»:
«Իրազեկ քաղաքացիների միավորում» ՀԿ-ի տրամադրված տվյալներով՝ Հայաստանի կառավարությունը հիմնականում դրամաշնորհ է ստանում ԵՄ-ից ու Եվրոպական բանկերից, ԱՄՆ-ից, Համաշխարհային բանկից, Ճապոնիայից, ՄԱԿ-ից եւ Լինսի հիմնադրամից:
Դանիել Իոաննիսյանը նշեց, որ Պաշտպանության նախարարությանը դրամաշնորհի փոխարեն տեխնիկա են տվել Չինաստանը եւ ԱՄՆ-ն: «Գյուղատնտեսության ոլորտում հիմնականում տեխնիկա տվել են Հնդկաստանը, Չինաստանը, Ճապոնիան: Հնդկաստանը, պարզվում է, մեզ մի քանի հարյուր տրակտոր է տվել»,-ասաց նա:
Կարդացեք նաև
Ինչ վերաբերում է էներգետիկայի ոլորտին, ըստ Իոաննիսյանի, 2009 թվականին Իրանը 2 միլիոն դոլար դրամաշնորհ տրամադրել է Մեղրին եւ Ագարակը գազիֆիկացնելու համար. «Մինչեւ հիմա ոչ Մեղրին, ոչ Ագարակը գազաֆիկացված չեն»:
Դանիել Իոաննիսյանը զրուցել է Մեղրիի փոխքաղաքապետի հետ եւ տեղեկացրել է Իրանի տրամադրած դրամաշնորհի մասին. «Ինքը շատ զարմացավ ու ասաց, որ ինքը չի լսել, որ որեւէ մեկը ուզենա իրենց քաղաքը գազիֆիկացնել»:
Աշոտ ԻՍՐԱԵԼՅԱՆ
