«Հուլիսի 23-ի համեմատ, իհարկե, ավելի պրոֆեսիոնալ էր, բայց բռնի ուժ, համենայնդեպս կիրառվեց»,- Aravot.am-ի հետ զրույցում անդրադառնալով լուսադեմին, Բաղրամյան պողոտայի նստացույցը ցրելու ոստիկանության գործողություններին, ասաց «Իրազեկ քաղաքացիների միավորում» նախաձեռնության համակարգող Դանիել Իոաննիսյանը: Նա նույնիսկ տարակուսում է. «Եթե իրենք կարող էին այսպես`առանց ջրանետ կիրառելու Բաղրամյանը բացել, ինչո՞ւ ամսի 23-ին դա չարեցին»:
Երեկ երեկոյան, հիշեցնենք, «Ոչ թալանին» նախաձեռնությունը կրկին փակել էր Բաղրամյան պողոտան`բողոքելով էլեկտրաէներգիայի թանկացման դեմ:
Մեր զրուցակիցը հիշեցնում է, որ Մարդու իրավունքների եվրոպական կոնվենցիայի 11-րդ հոդվածը եւ Մարդու իրավունքների եվրոպական դատարանի պրակտիկան հստակ սահմանում-ենթադրում են, որ խաղաղ հավաքը չի կարելի ցրել: «Խաղաղ ցույց անողն իրավունք ունի փողոց փակել: Խաղաղ ցույցն էլ պետական կյանքում շատ կարեւոր բաղադրիչ է, որը դեռ հին Հունաստանից է գալիս եւ ժողովրդավարության կարեւոր բաղադրիչ է: Խաղաղ ցույցը կարող է փողոց փակել, դա նաեւ գերակա հանրային շահ է, որովհետեւ, երբ փողոցը փակվում է ինչ-որ տոնակատարության համար, առանց այդ տոնակատարության, երկիրը պետությունը, ժողովրդավարությունը չի տուժի, բայց առանց խաղաղ ցույցի`կտուժեն: Շատ ավելի շատ կարելի է խաղաղ ցույցով փողոց փակել, քան այդ փողոցը վերանորոգելու, ինչ-որ պաշտոնյայի անցնելու եւ նման բաների համար»,- կարծում է մեր զրուցակիցը:
Նելլի ԳՐԻԳՈՐՅԱՆ
