«Ես պարզեցի, որ լիքը փրկիչ ունի հայ ժողովուրդը ու վխտում է հանրապետությունը փրկիչներով: Բոլորը փրկում են եւ բոլորը շատ պարզունակ բաղադրատոմս ունեն փրկության: Մեկը ասում է՝ գրի այո, կփրկվես, մյուսն ասում է՝ գրիր ոչ ու կփրկվես»,- ԱԺ-ում Սահմանադրական փոփոխությունների նախագծի քննարկման ժամանակ ասաց «Ժառանգություն» խմբակցության անդամ Ալեքսանդր Արզումանյանը:
Նա հիշեցրեց, որ 2012-ի խորհրդարանական ընտրություններին ընդառաջ, երբ միասնական դաշինքով «Ժառանգության» միասնական ցուցակն էին կազմում, միասին մասնակցել են նախընտրական ծրագրի ընդունմանն ու մշակմանը. «Այդ ծրագրում ասվում է՝ մեր երկրին օդ ու ջրի նման անհրաժեշտ են արագ, համակարգային փոփոխություններ, ընդ որում՝ փոփոխություններ այսօր, եւ ոչ թե վաղը: Թվարկել ենք այն քայլերը, որը կիրականացնենք՝ ընտրողների վստահության քվեն ստանալուց հետո: Առաջին կետում նշել ենք՝ իրականացնել սահմանադրական բարեփոխումներ՝ անցում կատարելով պետական կառավարման խորհրդարանական մոդելի»:
Նա հայտարարեց, որ հավատարիմ մնալով նախընտրական ծրագրին՝ բավականին դրական մոտեցում ունի՝ անցնելու խորհրդարանական կառավարման համակարգի: Նա ասաց, որ կիսանախագահական եւ խորհրդարանական կառավարման համակարգի առումով կարելի է վիճել, բայց մերժելի է այն մոտեցումը, որ եթե այս կամ մյուս համակարգը չլինի՝ քեզ մահ է սպասվում:
Նա նշեց, որ Լեւոն Տեր-Պետրոսյանն էլ, Ռոբերտ Քոչարյանն էլ ունեին մոտիվացիա Սահմանադրությունը փոխելու: Եվ հիմա թե կհաջողվի Սերժ Սարգսյանին վերարտադրվել 3 տարի հետո, դա քաղաքացիների խնդիրն է. «Ես չեմ կարծում, որ ցանկություններով այդ հարցերը կարելի է կարգավորել»:
Կարդացեք նաև
Հռիփսիմե ՋԵԲԵՋՅԱՆ
