Հայոց Ցեղասպանության 100-ամյակի կապակցությամբ անմեղ զոհերի հիշատակին Արթիկի շրջանի Հայրենյաց գյուղի Սուրբ Աստվածածին եկեղեցու կողքին հուշաքար է տեղադրվել:
Ինչպես Aravot.am-ի հետ զրույցում պատմեց գյուղի տարեց բնակիչ Գեւորգ Սարգսի Սարգսյանը, թուրքերը 1920 թվականին իրենց գյուղից 80 հոգու, հիմնականում ծերերի ու երիտասարդների կապել ու տարել են Ջաջուռ:
Իր պապը՝ Գեւորգը, որի անունը հիմա ինքն է կրում եւ որը զինվորական է եղել, գալով Սարիղամիշից, լսել է գյուղացիների գերեվարման մասին ու շտապել է բանակցելու թուրքերի հետ: Վերջինս խնդրել է գոնե երեխաներին բաց թողնել, սակայն թուրքերն անդրդվելի են եղել, այրել են բոլորին, այդ թվում Գեւորգի՝ Դորպատի համալսարան ավարտած եղբորը՝ Հուսիկին:
Կարդացեք նաև
Գյուղացիներից մեկը՝ Խանաեւը կարողացել է դուրս պրծնել, ձեռքը կոտրած վիճակում փախել է ու պատմել դաժան տեսարանը: Նա փոխանցել է, որ թուրքերը Գեւորգին կապել են ձիու վրա ու խփել:
«Եթե հայը զենք չվերցրեց, նա ապրելու իրավունք չունի, նա պիտի պայքարի, որովհետեւ թուրքը գազան անձնավորություն է, նա ոչ զարգացած անձնավորություն է,քաղաքակրթության չի ենթարկվում, իսկ հայը այդպիսին չէ», -ասում է մեր զրուցակիցը՝ բացառելով հայ-թուրքական հարաբերությունները բոլոր ժամանակաշրջաններում:
Նունե ԱՐԵՎՇԱՏՅԱՆ
