Ցմահ դատապարտյալների ծնողներն այսօր կառավարության առաջ վարչապետ Հովիկ Աբրահամյանից պահանջում էին վերանայել իրենց որդիների գործերը: Նրանց վրդովվեցրել էր այն, որ արդեն չորրորդ օրն է` Նուբարաշենի կալանավայրում 53 ցմահ դատապարտյալ հացադուլի է նստած, սակայն այս հանգամանքը որեւէ մի պատասխանատուի չի հետաքրքրում:
Դատապարտյալների ծնողները համոզված էին, որ իրենց որդիները պատիժը կրում են ուրիշի կատարած հանցագործության համար, սակայն դատախազությունը «հմտորեն» գործն իրենց որդիների «գլխին» է բարդել եւ, որքան էլ գործում նոր երեւան եկած հանգամանքներ են ի հայտ գալիս, արդարադատության մարմիններին չի հետաքրքրում, քանի որ խուսափում են գործերը բացել, ծնողների պահանջով վերանայել. «Հարուստների տղաների կատարած հանցագործությունները, մարդասպանությունները մեր տղաների վրա են բարդել ու դատել, առանց ապացույցների, դատախազությունը, դատավորները վճիռներ են կայացնում ու առանց խղճի խայթի դատում անմեղ մարդուն»:
Դատապարտյալների ծնողները հարյուրավոր կիլոմետրեր էին կտրել ու հասել կառավարություն՝ ցուցապաստառներով, սակայն մինչ այս ժամը կառավարությունից որեւէ մեկը նրանց պահանջը լսելու դուրս չէր եկել:
Ծնողները սպառնացին իրենց անձնագրերը պատռել եւ «շպրտել», քանի որ այլեւս չեն ցանկանում այս երկրի քաղաքացի լինել:
Կարդացեք նաև
Լուսինե ԲՈՒԴԱՂՅԱՆ
