Դպրոցից պետք է սովորեցնել ինչ ուտել
Սննդի անվտանգության գծով միջազգային փորձագետ Մարինա Միրալիան, որն այս օրերին Հայաստանում է, մեր երկրում սննդի անվտանգության համար պատասխանատուներին խորհուրդ է տալիս ռիսկի հաղորդակցումը ներառել մեր օրենսդրության մեջ: Ըստ նրա, Հանրային իրազեկումը եւ պարենային կրթությունը շատ կարեւոր է:
Տիկին Միրալիան միջազգային փորձով կիսվեց այսօր Ծաղկաձորում Կարողությունների զարգացման ծրագրի շրջանակներում լրագրողների համար կազմակերպված դասընթացի ժամանակ: Նա ասաց, որ պարենի աղբյուրը պետք է լինի անվտանգ, եւ որ երկրի սննդամթերքի անվտանգության ռազմավարությունը պետք է մշակվի 3 կարեւոր՝ ռիսկի գնահատում, ռիսկի կառավարում եւ ռիսկի հաղորդակցում բաղադրիչների հիման վրա: Նրա խոսքերով, կլիմայի փոփոխությունները սերտորեն կապված են պարենամթերքի անվտանգության եւ ապահովածության հետ:
«Ոչ վարակիչ հիվանդությունները վատ սնման հետեւանք են: Այդ պատճառով շատ կարեւոր է սննդի անվտանգության խնդիրը: Առողջ սնման համար դուք պետք է ունենաք հանրային իրազեկման եւ կրթական մոդել: Սպառողը պետք է
Կարդացեք նաև
հումքից մինչեւ փաթեթավորում պարտադիր կերպով ստանա ողջ տեղեկատվությունը: Ազգաբնակչությունը որոշ բաներ չի տեսնում, հետեւաբար, պետք է ծանուցվի»,-ասաց փորձագետը: Իտալիայից ժամանած Մարինա Միրալիան ասաց, որ իրենց երկրի մի շարք դպրոցներում պարենային կրթությունը հանդիսանում է պարտադիր ծրագիր. «Դպրոցական երեխաները շատ արագ են սովորում: Շատ ծնողներ պարզապես տեղեկացված չեն, այդ իսկ պատճառով ճիշտը դպրոցից երեխային ճիշտ սնվել սովորեցնելն է: Մեր պրակտիկան ցույց է տվել, որ դասընթացների ժամանակ իրենք էլ են սովորում:
Եթե դպրոցում մարդը չի սովորում ճիշտ սնվել հետագայում էլ չի սովորի մարդն ինքը պետք է իրազեկ լինի ինչպես պետք է սնվի, ինչ պետք է ուտի: Դպրոցական տարիների սովորածը երկար են հիշում եւ այն նպաստում է առողջ կենսաձեւին: Մարդիկ պետք է սովորեն առողջ սնվել, թարմ բանջարեղեն ուտել, իսկ վատ որակի սնունդը, որն օգտագործում են, մշտապես կարող է ռիսկային լինել եւ հանգեցնել մահվան»:
Լուսինե ԲՈՒԴԱՂՅԱՆ
